Ֆինլանդիայի նախագահը առաջարկել է Թրամփի հետ «սաունայի դիվանագիտությամբ» լուծել Գրենլանդիայի հարցը

Ֆինլանդիայի նախագահ Ալեքսանդր Ստուբբը հայտարարել է, որ ԱՄՆ նախագահ Դոնալդ Թրամփի հետ համատեղ սաունա գնալը կարող է օգնել լուծել Գրենլանդիայի շուրջ ձևավորված հակասությունները։ Այդ մասին նա ասել է The Washington Post-ին տված հարցազրույցում՝ առաջարկելով անցում կատարել «գոլֆի դիվանագիտությունից» դեպի «սաունայի դիվանագիտություն»։

Ստուբբի խոսքով՝ երբեմն անհրաժեշտ է դանդաղել, հանգստանալ և միայն հետո լուծում գտնել։ Նա նշել է, որ եթե հնարավոր լիներ համոզել Թրամփին սաունա գնալ, հնարավոր է առաջընթաց գրանցվեր՝ ընդգծելով, որ նման ոչ ֆորմալ միջավայրում դիվանագիտությունը կարող է ավելի արդյունավետ լինել։

Ավելի վաղ Դոնալդ Թրամփը խուսափել էր պատասխանել Գրենլանդիայի հնարավոր ուժային զավթման վերաբերյալ հարցին, սակայն հայտարարել էր, որ պատրաստ է Եվրոպայի նկատմամբ մաքսատուրքեր սահմանել, եթե կղզու շուրջ գործարք չկնքվի։ Reuters-ի փոխանցմամբ՝ Սպիտակ տան ղեկավարը նաև հրապարակել էր պատկեր, որտեղ ինքն է ներկայացված՝ Գրենլանդիայի տարածքում ԱՄՆ դրոշ բարձրացնելիս։