Զելենսկի․ Ուկրաինան չի ուղարկի զինված ուժեր Գրենլանդիա՝ ճակատում մարդկանց պակասի պատճառով

Ուկրաինայի նախագահ Վլադիմիր Զելենսկին հայտարարել է, որ Կիևը չի պատրաստվում զինված ուժերի ստորաբաժանումներ ուղարկել Գրենլանդիա՝ ռազմաճակատում մարդկային ռեսուրսների սուր պակասի պատճառով։ Նրա խոսքերը փոխանցում է «ՌԲԿ-Ուկրաինա»-ն՝ նախագահի Telegram-ալիքին հղումով։ «Մեր բոլոր զինվորները այսօր առաջնագծում են։ Զորքի հարցը այժմ դեֆիցիտային է», — ընդգծել է Զելենսկին։

Նա նման դիրքորոշում է հայտնել լրագրողների հարցին պատասխանելիս՝ նշելով նաև, որ Ուկրաինան ՆԱՏՕ-ի անդամ չէ, ինչն ինքնին սահմանափակում է նման հնարավոր քննարկումները։ Զելենսկու խոսքով՝ Դանիայի վարչապետ Մետտե Ֆրեդերիկսենը նույնպես իրեն չի դիմել Գրենլանդիա ուկրաինական զորք ուղարկելու խնդրանքով, չնայած կողմերի միջև առկա են լավ քաղաքական հարաբերություններ։

Ավելի վաղ Politico-ն հայտնել էր, որ Եվրոպայում քննարկվում է ՆԱՏՕ-ին այլընտրանքային նոր պաշտպանական միավորման ստեղծման հնարավորությունը՝ «ցանկացողների կոալիցիայի» ձևաչափով և Ուկրաինայի ներգրավմամբ։ Քննարկումները ակտիվացել են Գրենլանդիայի շուրջ լարվածության ֆոնին, ինչի կապակցությամբ Զելենսկին նախապես մտահոգություն էր հայտնել՝ զգուշացնելով, որ նման թեմաները չպետք է շեղեն ուշադրությունը Ուկրաինայից։