Եվրոպական պաշտպանական ընկերությունների արժեքը Ուկրաինայի պատերազմի ֆոնին եռապատկվել է

Ուկրաինայում ռազմական գործողությունների մեկնարկից հետո՝ 2022 թվականից ի վեր, եվրոպական պաշտպանական ընկերությունների բաժնետոմսերի արժեքը աճել է մոտ երեք անգամ։ Այդ մասին Համաշխարհային տնտեսական ֆորումի ընթացքում Դավոսում հայտարարել է Եվրահանձնաժողովի նախագահ Ուրսուլա ֆոն դեր Լայենը՝ ինչպես փոխանցում է РИА Новости-ն։

Նրա խոսքով՝ Եվրամիությունը կտրուկ ավելացրել է պաշտպանության ոլորտի ծախսերը, որոնք մինչև 2030 թվականը պետք է հասնեն շուրջ 800 միլիարդ եվրոյի։ Ֆոն դեր Լայենը նշել է, որ ԵՄ անդամ պետությունները ներկայում իրականացնում են պատմականորեն բարձր մակարդակի ներդրումներ պաշտպանական արդյունաբերության մեջ։

Ավելի վաղ Ուրսուլա ֆոն դեր Լայենը Reuters-ին հայտնել էր, որ Ուկրաինային հաստատված 90 միլիարդ դոլարի վարկային փաթեթի մոտ երկու երրորդը կուղղվի սպառազինության և ռազմական տեխնիկայի գնմանը, ընդ որում՝ այդ միջոցներով Կիևը պարտավոր կլինի ձեռք բերել եվրոպական արտադրության զինտեխնիկա։ Բացառություններ հնարավոր են միայն այն դեպքերում, երբ համապատասխան արտադրանք ԵՄ-ում չի արտադրվում, իսկ մատակարարման առաջնահերթություն կստանան Ուկրաինայում և Եվրոպական ազատ առևտրի գոտու երկրներում գործող պաշտպանական գործարանները։