Լավրով․ Եվրոպան մարդկության հիմնական խնդիրների աղբյուրն է

Ռուսաստանի արտաքին գործերի նախարար Սերգեյ Լավրովը հայտարարել է, որ Եվրոպան շարունակում է մնալ մարդկության հիմնական դժբախտությունների աղբյուրը և մինչ օրս ի վիճակի չէ փոխել իր մտածողությունը։ Այդ մասին նա ասել է ռուսական դիվանագիտության 2025 թվականի գործունեության արդյունքներին նվիրված մամուլի ասուլիսի ընթացքում, որի հեռարձակումը իրականացվել է YouTube հարթակում։

Լավրովի խոսքով՝ Եվրոպայի դերը պատմականորեն կապված է մարդկության խոշորագույն ողբերգությունների հետ՝ սկսած ստրկատիրությունից և գաղութատիրությունից մինչև երկու համաշխարհային պատերազմների սանձազերծումը, որոնք հանգեցրել են հսկայական մարդկային զոհերի։ Նախարարը ընդգծել է, որ այս անցյալը, նրա գնահատմամբ, շարունակում է ազդել եվրոպական քաղաքական մտածողության վրա։

Նախօրեին Սերգեյ Լավրովը նաև հայտարարել էր, որ եվրոպացի քաղաքական գործիչների հռետորաբանությունը վկայում է Ռուսաստանի հետ հնարավոր ռազմական բախման լուրջ նախապատրաստությունների մասին։ Միաժամանակ նա շեշտել է, որ եթե եվրոպական առաջնորդները իսկապես ցանկանում են բանակցություններ վարել Մոսկվայի հետ, ապա դրա համար, ըստ նրա, բավական է պարզապես կապ հաստատել Ռուսաստանի հետ։