Մոլդովան չի բացառում Ռումինիայի հետ միավորման հարցով հանրաքվեի անցկացումը

Մոլդովայի իշխանությունները չեն բացառում Ռումինիայի հետ միավորման հնարավորությունը՝ այդ գործընթացից առաջ հանրաքվե անցկացնելու տարբերակով։ Այդ մասին հայտարարել է երկրի արտաքին գործերի նախարար Միխայիլ Պոպշոյը՝ ինչպես հայտնում է Telegraph Moldova-ն նրա Telegram-ալիքին հղումով։ Նախարարի խոսքով՝ Ռուսաստանի «վտանգավոր մոտեցումը» Մոլդովայի սահմաններին կարող է իշխանություններին կանգնեցնել նման ռազմավարական ընտրության առաջ։

Ավելի վաղ՝ հունվարի 12-ին, Մոլդովայի նախագահ Մայա Սանդուն The Rest Is Politics փոդքասթում հայտարարել էր, որ ինքը կքվեարկեր Ռումինիայի հետ միավորման օգտին՝ ընդգծելով, որ ներկայիս միջազգային պայմաններում Կիշնևի համար դառնում է «ավելի ու ավելի դժվար» գործել որպես առանձին պետություն։ Նրա հայտարարությունը լայն քննարկումներ է առաջացրել ինչպես երկրի ներսում, այնպես էլ արտերկրում։

Միաժամանակ Մոլդովայի իշխանությունները շարունակում են հեռանալ հետխորհրդային կառույցներից։ Պոպշոյը հայտնել է, որ երկիրը կլքի ԱՊՀ-ն՝ կազմակերպության առանցքային համաձայնագրերի վավերացումը չեղարկելուց հետո։ Նման դիրքորոշում ավելի վաղ հայտնել էր նաև վարչապետ Ալեքսանդր Մունտյանուն։ Մոլդովան ԱՊՀ անդամ է 1994 թվականից, իսկ 2022-ից սկսած իշխանությունները սկսել են կազմակերպությունից դուրս գալու փուլային գործընթացը։