Դանիան ամբողջությամբ հրաժարվել է F-16-ից՝ անցնելով F-35 կործանիչների

Դանիայի Թագավորական ռազմաօդային ուժերը ամբողջությամբ դուրս են բերել չորրորդ սերնդի F-16 կործանիչները և անցել հինգերորդ սերնդի F-35 ինքնաթիռների օգտագործմանը։ Այդ մասին հայտնում է Military Watch Magazine-ը՝ նշելով, որ Դանիան դարձել է աշխարհում երրորդ երկիրը, որի ռազմաօդային ուժերը լիովին փոխարինել են F-16-ը նոր սերնդի կործանիչներով։

MWM-ի տվյալներով՝ Դանիայից առաջ նման անցում իրականացրել էին Նորվեգիան՝ 2022 թվականին, և Նիդերլանդները՝ 2024-ին։ Երեք երկրներն էլ եղել են F-35 ծրագրի գործընկերներ և ձեռք են բերել F-35A մոդելները՝ Սառը պատերազմի ժամանակաշրջանի փոքրաթիվ F-16 պարկերը փոխարինելու նպատակով։

Հրապարակման մեջ հիշեցվում է, որ դանիական F-16-ները տարիների ընթացքում մասնակցել են ԱՄՆ-ի գլխավորությամբ իրականացված մի շարք ռազմական գործողությունների՝ այդ թվում 1999 թվականին Հարավսլավիայի ռմբակոծություններին, 2002–2003 թվականներին Աֆղանստանում իրականացված գործողություններին և 2011 թվականին Լիբիայում ընթացած օպերացիային։ Բացի այդ, դրանք օգտագործվել են Բալթյան երկրներում օդային տարածքի պարեկության համար՝ Ռուսաստանի սահմանների մերձակայքում։ Military Watch Magazine-ը նշում է նաև, որ Դանիան ուներ F-16 կործանիչների ամենահին պարկերից մեկը՝ ընդհանուր 77 ինքնաթիռ, որոնց մի մասը փոխանցվել է Արգենտինային և Ուկրաինային։