«Գազպրոմ»․ Եվրոպան արդեն օգտագործել է ձմռան համար կուտակված գազի ավելի քան երկու երրորդը

Եվրոպան արդեն սպառել է ձմռան համար պահեստավորված գազի 67,5 տոկոսը։ Այդ մասին «Գազպրոմ»-ը հայտնել է՝ հղում անելով Gas Infrastructure Europe-ի տվյալներին։ Ընկերության տեղեկացմամբ՝ հունվարի 18-ի դրությամբ եվրոպական ստորգետնյա գազապահեստներում գազի մակարդակը նվազել է մինչև 49,8 տոկոս, ինչը նախորդ տարվա նույն ցուցանիշից երեք շաբաթ շուտ է գրանցվել։

«Գազպրոմ»-ի փոխանցմամբ՝ ընթացիկ ձմռան ընթացքում Եվրոպայում արդեն օգտագործվել է մոտ 33,8 միլիարդ խորանարդ մետր գազ։ Առանձին երկրներում պահեստների լցվածությունը զգալիորեն նվազել է․ Նիդերլանդներում այն կազմել է 35,4 տոկոս, Գերմանիայում՝ 42,2 տոկոս, Ֆրանսիայում՝ 41,7 տոկոս։ Տվյալները, ըստ ընկերության, վկայում են գազի արագ սպառման և շուկայի լարվածության աճի մասին։

«Իմպլեմենտա» խորհրդատվական ընկերության հետազոտությունների տնօրեն Մարիա Բելովայի խոսքով՝ գազի գների աճը պայմանավորված է երեք հիմնական գործոնով՝ եղանակային փոփոխություններով, ստորգետնյա պահեստներում ցածր պաշարներով և Ֆրանսիայում տեղի ունեցած փոթորկի ֆոնին պահանջարկի աճով։ Միաժամանակ Պետդումայի տնտեսական քաղաքականության կոմիտեի փոխնախագահ Սերգեյ Ալտուխովը չի բացառել, որ Գրենլանդիայի շուրջ ԱՄՆ-ի հետ լարվածության պայմաններում Եվրամիությունը կարող է հայտնվել ամերիկյան հեղուկացված գազից կախվածության մեջ՝ նշելով, որ Ռուսաստանը պատրաստ է էներգակիրներ մատակարարել Եվրոպային փոխշահավետ պայմաններով, եթե նախաձեռնությունը գա հենց ԵՄ-ից։