Բելգիայի վարչապետը կոչ է արել եվրոպացիներին չդառնալ «Թրամփի դժբախտ ստրուկները»

Բելգիայի վարչապետ Բարտ դե Վևերը հայտարարել է, որ եվրոպացիները պետք է միավորվեն, որպեսզի չհայտնվեն ԱՄՆ նախագահ Դոնալդ Թրամփի լիակատար կախվածության մեջ։ Նրա խոսքերը փոխանցում է РИА Новости-ն։ Դե Վևերի խոսքով՝ Եվրոպան պետք է ընտրի իր ինքնուրույն ուղին և չհայտնվի պարտադրանքի տակ։

«Երջանիկ վասալ լինելը մի բան է, իսկ դժբախտ ստրուկ լինելը՝ բոլորովին այլ», — նշել է Բելգիայի վարչապետը՝ ընդգծելով, որ եվրոպական երկրները պետք է հանդես գան միասնական դիրքերից։ Նրա գնահատմամբ՝ միայն համախմբված Եվրոպան կարող է պաշտպանել իր շահերն ու քաղաքական ինքնիշխանությունը։

Ավելի վաղ Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը զգուշացրել էր, որ ԱՄՆ-ի կողմից հնչող ուղիղ սպառնալիքները՝ կապված Գրենլանդիայի հնարավոր միացման հետ, կարող են վնաս հասցնել թե՛ ամերիկացիներին, թե՛ եվրոպացիներին, հաղորդում է РИА Новости-ն։