Գիտնականը «Բուրևեստնիկ» հրթիռը կապել է 1940-ականների խորհրդային հետազոտությունների հետ

Թևավոր «Բուրևեստնիկ» հրթիռի՝ միջուկային էներգետիկ կայանքով, և «Պոսեյդոն» ստորջրյա անօդաչու համակարգի ստեղծումը հիմնված է խորհրդային գիտնականների կողմից դեռևս 1940-ականների վերջում սկսված հետազոտությունների վրա, հայտարարել է «Կուրչատովի ինստիտուտ» ազգային հետազոտական կենտրոնի նախագահ Միխայիլ Կովալչուկը, հայտնում է РИА Новости-ն։

Կովալչուկի խոսքով՝ այդ աշխատանքների հիմքում ընկած է 1955 թվականին հաստատված զեկույցը՝ հեռահար գերձայնային «օդային-ռեակտիվ միջուկային շարժիչով» թռչող սարքի ստեղծման հնարավորության մասին։ Զեկույցը հաստատվել էր խորհրդային ատոմային ծրագրի գիտական ղեկավար Իգոր Կուրչատովի, նրա գործընկեր Անատոլի Ալեքսանդրովի և տեսական ֆիզիկոս Մստիսլավ Կելդիշի կողմից։

«Այսօր մենք ունենք «Բուրևեստնիկ» և «Պոսեյդոն» միայն այն պատճառով, որ մոտ 80 տարի առաջ այդ ուղղությամբ աշխատանքներ էինք իրականացնում»,— ընդգծել է Կովալչուկը։ Նա հավելել է, որ միջուկային ուժային կայանքների հետազոտությունները կատարվել են ԽՍՀՄ ԳԱ չափիչ սարքերի լաբորատորիայում, որը ներկայում հայտնի է որպես «Կուրչատովի ինստիտուտ»։ Ավելի վաղ ՌԴ նախագահ Վլադիմիր Պուտինը նշել էր, որ «Բուրևեստնիկ»-ում կիրառված տեխնոլոգիաները արդեն օգտագործվում են նաև տիեզերական ծրագրերում։