Թրամփը եվրոպացիներին խոստացել է կոշտ պատասխան՝ ԱՄՆ պարտատոմսերի հնարավոր վաճառքի դեպքում

 ԱՄՆ նախագահ Դոնալդ Թրամփը հայտարարել է, որ պատրաստ է լուրջ պատասխան քայլերի դիմել եվրոպական երկրների դեմ, եթե նրանք սկսեն վաճառել ամերիկյան պետական պարտատոմսերը։ «Մեր ձեռքում են բոլոր քարտերը»,— ասել է նա Fox Business հեռուստաալիքին տված հարցազրույցում։

Թրամփի այս հայտարարությունը հնչել է այն ֆոնին, երբ նա սպառնացել էր նոր մաքսատուրքեր սահմանել այն պետությունների նկատմամբ, որոնք չեն համաձայնում նրա քաղաքականությանը Գրենլանդիայի հարցում։ Դրանից հետո քննարկումներ են սկսվել այն մասին, որ եվրոպացիները, որոնք ԱՄՆ պարտատոմսերի և բաժնետոմսերի մեջ ներդրել են մոտ 8 տրիլիոն դոլար՝ գրեթե կրկնակի ավելի, քան աշխարհի մնացած երկրները միասին, կարող են վերանայել իրենց ներդրումային քաղաքականությունը։

Մասնավորապես, դանիական AkademikerPension կենսաթոշակային ֆոնդը հայտարարել է, որ հունվարին նախատեսում է վաճառել ԱՄՆ ֆինանսների նախարարության մոտ 100 միլիոն դոլարի պետական պարտատոմսեր՝ դա բացատրելով Վաշինգտոնի «վատ ֆինանսական վիճակով»։ ԱՄՆ ֆինանսների նախարար Սքոթ Բեսենթը, իր հերթին, նշել է, որ այդ քայլը իրեն «բոլորովին չի անհանգստացնում»՝ ներդրումների համեմատաբար փոքր ծավալի պատճառով։