ԱՄՆ-ը կարող է «անջատել» Դանիայի F-35 կործանիչները՝ Գրենլանդիայի շուրջ լարվածության ֆոնին

ԱՄՆ-ը կարող է տեխնիկապես անջատել Դանիայի զինված ուժերի հինգերորդ սերնդի F-35 կործանիչները՝ դրանք զրկելով առանցքային թվային համակարգերից, գրում է Military Watch Magazine-ը։ Խոսքը վերաբերում է ALIS և ODIN համակարգերին, որոնք պատասխանատու են ինքնաթիռների շահագործման, տեխնիկական սպասարկման, ուսուցման և պահեստամասերի մատակարարման շղթայի համար։

Պարբերականի գնահատմամբ՝ այդ համակարգերը ուղղակիորեն կապված են Lockheed Martin կորպորացիայի հետ, և դրանցից F-35-ների անջատումը կարող է դառնալ օտարերկրյա շահագործողների կողմից կիրառվող ինքնաթիռները գործունակությունից դուրս բերելու «հատկապես արդյունավետ միջոց»։ Նշվում է, որ միայն Մեծ Բրիտանիան և Իսրայելն ունեն բավարար մուտք F-35-ի սկզբնական կոդին՝ ինքնաթիռները հարաբերական ինքնուրույնությամբ կառավարելու համար։

Միևնույն ժամանակ, ըստ MWM-ի, Վաշինգտոնը, ամենայն հավանականությամբ, կփորձի խուսափել նման քայլից, քանի որ դա կարող է վնասել F-35-ի նկատմամբ հետաքրքրությանը միջազգային շուկաներում։ Ավելի վաղ հայտնի էր դարձել, որ Դանիայի թագավորական ռազմաօդային ուժերը ամբողջությամբ հրաժարվել են F-16 կործանիչներից՝ անցնելով բացառապես F-35-երի շահագործման։