Եվրոպան լուռ հրաժեշտ է տալիս հին աշխարհակարգին․ Politico

Բրյուսելում կայացած Եվրոպական խորհրդի անդամների ոչ պաշտոնական հանդիպումը դարձել է լուռ, բայց հստակ ազդակ այն մասին, որ գոյություն ունի ճակատագրական խզում հին և նոր կարգերի միջև՝ այն Արևմուտքի, որը գործել է Երկրորդ համաշխարհային պատերազմից հետո, և այն իրականության, որը նրան սպասում է առաջիկայում։ Այս մասին գրում է Politico-ն՝ հղում անելով իր աղբյուրներին։

Պարբերականի զրուցակիցների խոսքով՝ թեև Եվրոպայի անկախության ձգտումը հասունանում էր տարիներ շարունակ՝ դեռ այն ժամանակվանից, երբ ԱՄՆ նախագահ Դոնալդ Թրամփը առաջին անգամ ստանձնեց պաշտոնը 2017 թվականին, նրա՝ Գրենլանդիայի հասցեին հնչեցրած աննախադեպ սպառնալիքները հանկարծակի ահազանգ դարձան։ Դրանք եվրոպացի առաջնորդներին ստիպեցին դիմել քայլերի, որոնք ընդամենը մի քանի ամիս առաջ անհնարին էին թվում։

«Սա Ռուբիկոնի պահն է։ Եվրոպան այլևս չի կարող վերադառնալ նախկին վիճակին։ Ղեկավարները դրա մասին խոսում են արդեն մի քանի օր», - նշել է ԵՄ արևելյան թևի երկրներից մեկի դիվանագետը։ Մեկ այլ դիվանագետ էլ հայտարարել է, որ սկսվում է նոր դարաշրջան, որտեղ Եվրոպան այլևս չի հենվելու ԱՄՆ-ի վրա՝ առնվազն առաջիկա երեք տարիների ընթացքում, քանի դեռ Թրամփը շարունակում է մնալ իշխանության ղեկին։