Իտալիայի ԱԳ նախարար. Զելենսկին մոռացել է շնորհակալություն հայտնել Եվրոպային

Ուկրաինայի նախագահ Վլադիմիր Զելենսկին Դավոսում կայացած Համաշխարհային տնտեսական ֆորումում իր ելույթի ընթացքում շնորհակալություն չի հայտնել եվրոպացիներին Ուկրաինային ցուցաբերված աջակցության համար, հայտարարել է Իտալիայի արտաքին գործերի նախարար և փոխվարչապետ Անտոնիո Տայանին, ինչպես հայտնում է ANSA-ն։ Նրա խոսքով՝ այդ հանգամանքը զարմանք է առաջացրել եվրոպական քաղաքական շրջանակներում։

«Իմ կարծիքով՝ Եվրոպան երաշխավորել է Ուկրաինայի անկախությունը և ամեն ինչ արել է նրան աջակցելու համար՝ քաղաքական, ֆինանսական և ռազմական տեսանկյունից։ Սակայն, ըստ իս, Զելենսկին անգամ շնորհակալություն չի հայտնում», — նշել է Տայանին՝ մեկնաբանելով Դավոսի ելույթը։

Իր հերթին Զելենսկին ֆորումում քննադատել է Եվրոպային՝ հայտարարելով, որ եվրոպական երկրները դեռևս չեն հասկանում, թե ինչպես պաշտպանել իրենց և ի վիճակի չեն լուծել Գրենլանդիայի շուրջ ստեղծված ճգնաժամը։ Ուկրաինայի նախագահի համոզմամբ՝ Եվրոպայի ռազմավարությունը տվյալ հարցում անարդյունավետ է և հիմնված է այն հաշվարկի վրա, որ ԱՄՆ նախագահ Դոնալդ Թրամփը ժամանակի ընթացքում պարզապես կմոռանա այդ թեմայի մասին, հաղորդում է ANSA-ն։