ChatGPT-ն օգնել է իսպանացի մարզչին ղեկավարել ռուսական ֆուտբոլային ակումբ

Իսպանացի մարզիչ Ռոբերտ Մորենոն ռուսական «Սոչի» ֆուտբոլային ակումբում աշխատանքի ընթացքում օգտագործել է ChatGPT-ը՝ թիմի պատրաստվածությունն ու որոշ ռազմավարական քայլեր մշակելու համար, հայտնել է ակումբի նախկին փոխգլխավոր տնօրեն Անդրեյ Օռլովը Sports.ru-ին տված հարցազրույցում։ Նրա խոսքով՝ սկզբում Մորենոն տպավորություն էր թողնում որպես բարձրակարգ մասնագետ, սակայն հետագայում փորձել է թիմը ճգնաժամից դուրս բերել արհեստական բանականության օգնությամբ։

Օռլովը պատմել է, որ Առաջին լիգայի արտագնա խաղերից մեկից առաջ Մորենոն մարզումների պլանը կազմել է ChatGPT-ի առաջարկությունների հիման վրա։ Այդ ծրագրով ֆուտբոլիստները պետք է 28 ժամ անընդմեջ չքնեին։ Հարցին, թե երբ պետք է խաղացողները քնեն, մարզիչը պարզապես փոխել է տվյալները, և ներկայացումը թարմացվել է՝ պահպանելով նույն տրամաբանությունը։ Արդյունքում թիմը ուղևորության է մեկնել ChatGPT-ի կազմած ժամանակացույցով, հիշում է Օռլովը։

Նրա խոսքով՝ Մորենոն նաև փորձել է չատ-բոտի միջոցով որոշել, թե որ ֆուտբոլիստի հետ արժե պայմանագիր կնքել։ ChatGPT-ը խորհուրդ է տվել ընտրել ղազախ ֆուտբոլիստ Արթուր Շուշենաչևին, որը հետագայում չի արդարացրել սպասելիքները։ Ռոբերտ Մորենոն «Սոչի»-ն գլխավորել է 2023 թվականի դեկտեմբերից մինչև 2025 թվականի օգոստոսը․ այդ ընթացքում թիմը դուրս է մնացել Պրեմիեր լիգայից, ապա վերադարձել բարձրագույն դիվիզիոն, սակայն նոր մրցաշրջանի անհաջող մեկնարկից հետո ակումբը խզել է պայմանագիրը մարզչի հետ, հայտնում է Sports.ru-ն։