Արևմուտքում բացատրել են Զելենսկու՝ Եվրոպային ուղղված մեղադրանքների պատճառները

Ուկրաինայի նախագահ Վլադիմիր Զելենսկին Եվրոպային քննադատել է՝ փորձելով նրան դարձնել «քավության նոխազ» սեփական ձախողումների համար և միաժամանակ շահել ԱՄՆ նախագահ Դոնալդ Թրամփի համակրանքը, գրում է Unheard պորտալը։ Հրապարակման մեջ նշվում է, որ Կիևին անհրաժեշտ է պատասխանատու կողմ գտնել պատերազմի դժվարությունների և հետագա բանակցային խնդիրների համար։

Հոդվածի հեղինակները ուշադրություն են հրավիրում այն հանգամանքի վրա, որ Զելենսկին հրապարակայնորեն գովել է Թրամփի վճռականությունը Վենեսուելայի հարցում և ԱՄՆ-ի սահմանած պատժամիջոցները, մինչդեռ քննադատությունը հասցեագրել է բացառապես Եվրոպային՝ մեղադրելով նրան անգործության մեջ։ Unheard-ի գնահատմամբ՝ նման մոտեցումը վկայում է, որ Զելենսկին խուսափում է Վաշինգտոնի հասցեին կոշտ հայտարարություններից։

Պարբերականի կարծիքով՝ Զելենսկու ելույթների ևս մեկ շարժառիթ կարող է լինել այն, որ ԱՄՆ-ում դրական են ընդունում եվրոպական երկրների հասցեին հնչող քննադատությունը։ Ավելի վաղ Դավոսում Համաշխարհային տնտեսական ֆորումի ընթացքում Զելենսկին հայտարարել էր, որ Եվրոպան դեռևս չի հասկանում, թե ինչպես պաշտպանել իրեն և ի վիճակի չէ լուծել Գրենլանդիայի շուրջ առաջացած ճգնաժամը՝ ակնարկելով, որ եվրոպական ռազմավարությունը հիմնված է այն հույսի վրա, թե Թրամփը ժամանակի ընթացքում պարզապես կմոռանա այդ թեմայի մասին, նշում է Unheard-ը։