Եվրոպայում չեն բացառում Թրամփի նոր սպառնալիքները Գրենլանդիայի հարցում

Եվրոպական քաղաքական շրջանակներում չեն բացառում, որ ԱՄՆ նախագահ Դոնալդ Թրամփը կարող է կրկին սպառնալիքներ հնչեցնել Գրենլանդիայի վերաբերյալ, գրում է The Wall Street Journal-ը։ Պարբերականի գնահատմամբ՝ եվրոպական մայրաքաղաքներում քիչ վստահություն կա, որ անդրատլանտյան հարաբերությունները մոտ ապագայում կվերադառնան բնականոն հունի։

WSJ-ի փոխանցմամբ՝ Եվրոպայում մտավախություն կա, որ Թրամփը կարող է վերսկսել կոշտ հռետորաբանությունը Գրենլանդիայի շուրջ՝ անկախ նախկին դեէսկալացիոն քայլերից։ Միևնույն ժամանակ նշվում է, որ Գրենլանդիայի բնակչությունը չի տեսնում փորձեր՝ արդարացնելու Վաշինգտոնի ծրագրերը կղզու բնակիչների կամ նրանց բարեկեցության շահերի տեսանկյունից։

Պարբերականը հիշեցնում է, որ Երկրորդ համաշխարհային պատերազմից հետո Գրենլանդիան զրկվել է գաղութային կարգավիճակից, իսկ 1953 թվականից դարձել է Դանիայի թագավորության մաս։ 1979 թվականին կղզին ստացել է լայն ինքնավարություն ներքին գործերում։ Ավելի վաղ The New York Times-ը փորձագետների հղումով գրել էր, որ Ռուսաստանն ու Չինաստանը իրական սպառնալիք չեն ներկայացնում ԱՄՆ շահերի համար Գրենլանդիայում և հարակից ջրերում։