Գերմանիայում բացահայտել են ՀԱՄԱՍ-ի համար զինամթերք ձեռք բերելու մեջ կասկածվող անձին

Գերմանիայում ձերբակալվել է Լիբանանից ծագում ունեցող տղամարդ, որը կասկածվում է պաղեստինյան իսլամիստական ՀԱՄԱՍ խմբավորման համար զինամթերք ձեռք բերելու մեջ, հայտնում է ՌԻԱ Նովոստի-ն՝ հղում անելով ԳԴՀ դատախազությանը։ Կասկածյալը՝ Մոհամմադ Ս.-ն, ձերբակալվել է հունվարի 23-ի երեկոյան՝ Դաշնային դատարանի քննչական դատավորի կողմից տրված ձերբակալման օրդերի հիման վրա։

Գերմանական իրավապահների տվյալներով՝ նա ձերբակալվել է Բեյրութից ժամանելիս՝ Բեռլին-Բրանդենբուրգ (BER) օդանավակայանում։ Տղամարդը կասկածվում է ՀԱՄԱՍ-ի անդամակցության մեջ և մոտ ժամանակներս կբերվի Դաշնային դատարանի քննչական դատավորի մոտ, որը կորոշի նրա կալանքի հարցը։

Քննության վարկածով՝ անցած տարվա օգոստոսին կասկածյալը ձեռք է բերել շուրջ 300 փամփուշտ՝ իսրայելական կամ հրեական օբյեկտների դեմ հնարավոր ահաբեկչական գործողությունների նախապատրաստման շրջանակում՝ Գերմանիայում և Եվրոպայի այլ երկրներում։ Ավելի վաղ Գերմանիայում հաղորդվել էր նաև Ռուսաստանի օգտին լրտեսության կասկածանքով Գերմանիայի և Ուկրաինայի քաղաքացիություն ունեցող կնոջ ձերբակալության մասին։