Սպիտակ տանը կոշտ քննադատել են Եվրոպայի քաղաքականությունը՝ հայտարարելով «ինքնաոչնչացման» մասին

Եվրոպան «դանդաղորեն սպանում է ինքն իրեն»՝ խեղդելով սեփական էներգետիկան խիստ կարգավորումներով և կախվածություն ստեղծելով ոչ արդյունավետ «կանաչ» էներգիայի ու արտաքին մատակարարների նկատմամբ, Fox News-ի եթերում հայտարարել է Սպիտակ տան աշխատակազմի ղեկավարի տեղակալ Սթիվեն Միլլերը՝ մեկնաբանելով ԱՄՆ նախագահ Դոնալդ Թրամփի կոշտ ելույթը Համաշխարհային տնտեսական ֆորումում Դավոսում։ Նրա խոսքով՝ նման քաղաքականությունը լրջորեն վնասում է Եվրոպայի մրցունակությանը։

Միլլերը նաև քննադատել է եվրոպական երկրների միգրացիոն քաղաքականությունը և պաշտպանական ոլորտում ներդրումների պակասը՝ նշելով, որ Եվրոպան տարիներ շարունակ ապավինել է Վաշինգտոնի կողմից սեփական պաշտպանության սուբսիդավորմանը։ Նրա գնահատմամբ՝ էներգետիկ, միգրացիոն և ռազմական քաղաքականությունների համադրությունը հանգեցրել է համակարգային խնդիրների, որոնք խորացնում են մայրցամաքի կախվածությունն ու խոցելիությունը։

Ավելի վաղ Դավոսում ելույթի ընթացքում Դոնալդ Թրամփը ևս կոշտ էր արտահայտվել Եվրոպայի հասցեին՝ հայտարարելով, որ մայրցամաքը շարժվում է սխալ ուղղությամբ և վերջին տարիներին դարձել է «խնդրահարույց»։ Նա նաև քննադատել էր Եվրոպայի դիրքորոշումը Ուկրաինայի հարցում՝ նշելով, որ եվրոպացիները շատ են խոսում, սակայն քիչ են գործում, ինչպես նաև անընդունելի էր անվանել այն փաստը, որ Եվրոպան միաժամանակ պայքարում է Ռուսաստանի դեմ և շարունակում գնել նրա էներգակիրները։