Արտակարգ իրավիճակ՝ Սյունիքում․ Շինուհայրի խաչմերուկում բեռնատարների շարժը ժամանակավորապես արգելվել է

Այսօր՝ հունվարի 24-ին, ՀՀ Ներքին գործերի նախարարության ոստիկանության Պարեկային ծառայության Սյունիքի մարզի գումարտակի պարեկները՝ գումարտակի հրամանատար Արսեն Սևոյանի, գումարտակի ծառայության ավագ տեսուչ Նարեկ Մանուչարյանի և 2-րդ վաշտի հրամանատար Ազատ Թադևոսյանի գլխավորությամբ, շարունակում են ուժեղացված ծառայությունը Սյունիքի մարզում։ Այս պահին ուժեղ բքի պատճառով Շինուհայր խաչմերուկից դեպի Կապան ավտոճանապարհին բեռնատարների շարժը, ելնելով վարորդների անվտանգությունից, ժամանակավորապես դադարեցվել է։

Ինչպես տեղից հայտնում է ֆոտոլրագրող Գագիկ Շամշյանը, ճանապարհը սպասարկող Գորիսի ճանշինը արդեն 2 օր է՝ հսկայածավալ աշխատանքներ է իրականացնում, ինչի արդյունքում ճանապարհները հիմնականում անցանելի են։ Սակայն որոշ հատվածներում ճանապարհը մաքրելուց հետո բուքը իր «սև գործն» է անում՝ ձյունը կրկին բերում ու լցնում մաքրված ճանապարհների վրա։

Ճանշինի տեխնիկային ուղեկցում են պարեկները, որպեսզի որոշ «վայ» վարորդներ, հիմնականում՝ իրանցիներ, չփորձեն բեռնատարները կայանել, չերթևեկեն հանդիպակաց գոտիով և խցանումներ չառաջանան։ Պարեկներն ու ՀՀ Ներքին գործերի նախարարության Փրկարար ծառայության Սիսիանի և Գորիսի հրշեջ-փրկարարները աշխատում են բքի պայմաններում. քամին այնքան ուժգին է, որ մի քանի պարեկների և փրկարարների անգամ գլխարկներն է քշել։