«Զվարթնոց ավիաօդերևութաբանական կենտրոն» ՓԲ ընկերության տնօրենը պատճառել է 7.877.834 ՀՀ դրամ վնաս

Իրավունք 25 Հունվար, 2026 11:18

Հունվարի 16-ին Հակակոռուպցիոն դատարան գործ է ստացվել մեղադրական եզրակացությամբ և նույն օրը մակագրվել դատավոր Լևոն Պետրոսյանին։ Գործով մեղադրյալ է հանդիսանում ՀՀ շրջակա միջավայրի նախարարության «Զվարթնոց» ավիաօդերևութաբանական կենտրոն» ՓԲ ընկերության տնօրենը։ Այս մասին հայտնում է՝ Iravaban.net-ը՝ հղում անելով Դատալեքս դատական տեղեկատվական համակարգին։

Դեպքի հանգամանքները

Թ․Հ․-ին մեղադրանք է առաջադրվել այն բանի համար, որ նա ՀՀ շրջակա միջավայրի նախարարի՝ 2019 թվականի հուլիսի 23-ի թիվ 229-Ա հրամանով նույն թվականի հուլիսի 24-ից նշանակվելով ՀՀ շրջակա միջավայրի նախարարության «Զվարթնոց» ավիաօդերևութաբանական կենտրոն» ՓԲ ընկերության տնօրենի պաշտոնակատար, ի պաշտոնե իրականացնելով ընկերության ընթացիկ գործունեության ղեկավարումը, ընկերության անունից գործարքների կատարումը, ընկերության ֆինանսական միջոցների տնօրինումը, կրելով ի շահ իր կողմից ներկայացվող ընկերության՝ բարեխղճորեն և ողջամիտ գործելու պարտականություն՝ մեկ միասնական դիտավորությամբ 2021-2022 թվականների ընթացքում ոչ պատշաճ է կատարել իր ծառայողական պարտականությունները՝ ԶԱՕԿ-ՀՄԱ-ԱՊՁԲ-21/25, ԶԱՕԿ-ԷԱՃ-ԱՊՁԲ-22/26 և ԶԱՕԿ-ԲՄ-ԱՊՁԲ-22/28 ծածկագրերով անցկացված մրցույթներից առաջ միջոցներ չի ձեռնարկել ձեռք բերվելիք ապրանքների նկատմամբ կիրառվող մաքսատուրքերի դրույքաչափերի առկայության կամ բացակայության, ինչպես նաև դրանց չափերի հանգամանքը պարզելու ուղղությամբ, որպիսի գործողությունների հետևանքով «Զվարթնոց ավիաօդերևութաբանական կենտրոն» ՓԲ ընկերությանը պատճառվել է առանձնապես խոշոր չափերով՝ ընդհանուր 7.877.834 ՀՀ դրամ վնաս:

Ընտրված խափանման միջոցը

Մեղադրյալի նկատմամբ որպես խափանման միջոց ընտրվել է բացակայելու արգելքը։

Թ․Հ․-ին մեղադրանք է առաջադրվել ՀՀ ՔՕ 277 հոդվածի 2-րդ մասի 2-րդ կետով` մասնավոր ոլորտում ծառայողական լիազորությունները կամ դրանցով պայմանավորված ազդեցությունը չարաշահելը պատճառել է առանձնապես խոշոր չափերի գույքային վնաս։

Նախատեսվող պատիժը՝

տուգանք՝ քսանապատիկից քառասնապատիկի չափով, կամ
հանրային աշխատանքներ՝ հարյուր հիսունից երկու հարյուր հիսուն ժամ տևողությամբ, կամ
ազատության սահմանափակում` առավելագույնը երեք տարի ժամկետով, կամ
կարճաժամկետ ազատազրկում` մեկից երկու ամիս ժամկետով, կամ
ազատազրկում` առավելագույնը չորս տարի ժամկետով:

Գործը քննվել է հակակոռուպցիոն կոմիտեում։

Գործով վարույթ սկսելու և նախնական դատալսումներ նշանակելու որոշման մասին տեղեկություններ Դատալեքս տեղեկատվական համակարգում դեռևս առկա չեն։

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: