Քննարկվել են Հայաստան-Բելգիա միջխորհրդարանական համագործակցության և տարածաշրջանային հարցերը

ՀՀ ԱԺ Հայաստան-Բելգիա բարեկամական խմբի ղեկավար Արմեն Ռուստամյանը, խմբի անդամներ Շիրակ Թորոսյանը, Ալեքսեյ Սանդիկովը և Հռիփսիմե Հունանյանը մարտի 30-ին հանդիպել են Բելգիայի Թագավորության խորհրդարանի Բելգիա-Հայաստան բարեկամական խմբի՝ Հայաստան ժամանած ներկայացուցիչների հետ:

Ողջունելով հյուրերին՝ Հայաստան-Բելգիա բարեկամական խմբի ղեկավար Արմեն Ռուստամյանը նշել է, որ անցած հինգ տարիների ընթացքում, երբ գործել է Հայաստան-Բելգիա բարեկամական խումբը, բազմաթիվ հնարավորություններ են եղել խոսելու միմյանց հուզող հարցերի մասին: Նրա խոսքով սա լավ առիթ է՝ բարեկամների հետ  ամփոփելու անցած տարիների աշխատանքը:

Անդրադառնալով տարածաշրջանային զարգացումներին՝ Արմեն Ռուստամյանը խոսել է հարևան Ադրբեջանի հետ հարաբերություններից, սկսված խաղաղության գործընթացից: Նրա գնահատմամբ կայուն և անշրջելի խաղաղություն կարող է լինել, եթե լուծվում են այն բոլոր խնդիրները, որոնք եղել են:

Հանդիպմանը զրուցակիցներն անդրադարձել են մի շարք հարցերի, որոնք վերաբերում էին Հայաստան-Բելգիա ամուր կապերին, միջխորհրդարանական հարաբերություններին, «Հայաստանի Հանրապետության և Ադրբեջանի Հանրապետության միջև խաղաղության և միջպետական հարաբերությունների հաստատման մասին» նախաստորագրված համաձայնագրին, Լեռնային Ղարաբաղից բռնի տեղահանված անձանց իրավունքներին և նրանց վերադարձի հնարավորությանը, Բաքվում պահվող անձանց ազատ արձակմանը, Հայաստանում առաջիկա խորհրդարանական ընտրություններին, սահմանադրական փոփոխություններին:

Բելգիայի Թագավորության խորհրդարանի Բելգիա-Հայաստան բարեկամական խմբի ղեկավար Էլս Վան Հոֆն իր հերթին ընդգծել է երկու երկրների միջև բարեկամական հարաբերությունները, այդ համատեքստում կարևորել խորհրդարանական համագործակցությունը:  «Հայաստանի և Բելգիայի միջև բարեկամությունը հիմնված է ընդհանուր և համատեղ արժեքների վրա՝ ժողովրդավարություն, օրենքի գերակայություն, խաղաղություն, կայունություն: Եվ այդ արժեքները մեր ընդհանուր արժեքներն են, որոնց հետ կապված շատ քննարկումներ են լինում Բելգիայի խորհրդարանում՝ ներառյալ Հայաստան-Ադրբեջան հակամարտության թեման»,- ասել է նա՝ հավելելով, որ վերջին հինգ տարիների ընթացքում Բելգիայի խորհրդարանը չորս բանաձև է ընդունել Հայաստանի առնչությամբ:

ԱԺ Հայաստան-Բելգիա բարեկամական խմբի անդամ Շիրակ Թորոսյանը եվրոպացի գործընկերներին քննարկված հարցերի վերաբերյալ ներկայացրել է պաշտոնական տեսակետները, կարևորել կայուն և անշրջելի խաղաղությանն ուղղված գործընթացը: