Ուկրաինայում գործարկվել է մասնավոր ՀՕՊ․ առաջին արդյունքները արդեն կան

Ուկրաինայում սկսել է գործել մասնավոր հակաօդային պաշտպանության (ՀՕՊ) համակարգը։ Այս մասին հայտարարել է երկրի փոխվարչապետ Միխայիլ Ֆեդորովը՝ նշելով, որ արդեն գրանցվել են թշնամական թիրախների առաջին խոցումները։

Նրա խոսքով՝ մասնավոր ընկերություններից մեկը ձևավորել է սեփական ՀՕՊ ստորաբաժանում և, ըստ ներկայացված տվյալների, կարողացել է խոցել մի քանի անօդաչու սարք Խարկովի մարզում։ Բացի այդ, ևս 13 ուկրաինական ձեռնարկություններում ձևավորվում են նմանատիպ խմբեր՝ ընդլայնելով պաշտպանության հնարավորությունները։

Այս նախաձեռնությունը տեղի է ունենում այն ֆոնին, երբ Ուկրաինան ակտիվորեն զարգացնում է իր պաշտպանական տեխնոլոգիաները ոչ միայն երկրի ներսում, այլև արտերկրում։ Ավելի վաղ հայտարարվել էր, որ ուկրաինացի մասնագետները Մերձավոր Արևելքում ներգրավված են ենթակառուցվածքների և քաղաքացիական բնակչության պաշտպանության աշխատանքներում։