Նարեկ Կարապետյանն ու Ռուբեն Ռուբինյանը կհաստատե՞ն գրազը թե, ոչ

ԱԺ փոխխոսնակ Ռուբեն Ռուբինյանը «Ֆեյսբուք»-ի իր էջում տեսանյութ է հրապարակել՝ տեղեկացնելով, որ ընդունում է «Ուժեղ Հայաստան» կուսակցության ղեկավար Սամվել Կարապետյանի զարմիկի՝ Նարեկ Կարապետյանի գրազի առաջարկն ու գրազ գալիս 1 միլիարդ դոլարի վրա:

Ռուբինյանը շեշտել է, որ եթե նրանք են պարտվում, Նարեկ Կարապետյանն ու նրա ընտանիքը պարտավորվում են 1 միլիարդ դոլար վճարել ՀՀ պետական բյուջե, իսկ իր պարտվելու դեպքում ինքը պատրաստ է սպիտակ թղթի վրա իրեն ուղղված ցանկացած առաջադրանք կատարել, անգամ եթե նշված լինի՝ ինքնասպան լինել:

ԱԺ փոխխոսնակը նշել է, որ 12 ժամ է տալիս՝ գրազը հրապարակային հաստատելու համար:

«Այլապես կֆիքսեմ, որ նրանք օդ են, ինչպես իրենց բոլոր ասածները»,- ասել է Ռուբինյանը:

Հիշեցնենք, որ երեկ Նարեկ Կարապետյանը գրազ է եկել, որ «Ուժեղ Հայաստան»-ը իր ձայնը չի տալու Ռոբերտ Քոչարյանին։

«Մեր ուժն իր ձայնը տալու է Սամվել Կարապետյանին որպես Հայաստանի հաջորդ վարչապետի:

Ով կասկածի, ասեք Նարեկ Կարապետյանը գրազ է գալիս, ինչ գրազ ուզում են, թող ասեն, ու գրազն էլ դուք կվերցնեք հաղթելուց հետո», – Գավառում քաղաքացիների հետ հանդիպմանն ասել է «Ուժեղ Հայաստան» կուսակցության խորհրդի անդամ Նարեկ Կարապետյանը։