Եվրոպային կոչ են անում պատրաստվել երկարատև էներգետիկ ճգնաժամի

Եվրահանձնաժողովի էներգետիկայի հանձնակատար Դեն Յորգենսենը կոչ է արել ԵՄ երկրներին արդեն հիմա պատրաստվել Մերձավոր Արևելքից էներգակիրների մատակարարման երկարատև խափանումների՝ Իրանում ընթացող պատերազմի պատճառով։ Նրա խոսքով՝ անհրաժեշտ է կանխարգելիչ քայլեր ձեռնարկել՝ ճգնաժամի խորացումը նվազեցնելու համար։

Յորգենսենը նշել է, որ Եվրոպան շարունակում է կախված մնալ նավթի և հեղուկացված գազի ներմուծումից, իսկ էներգակիրների գների կտրուկ աճը կարող է լրջորեն հարվածել տնտեսություններին։ Վերջին տվյալներով՝ Նիդերլանդների TTF հաբում գազի գինը աճել է ավելի քան 70 տոկոսով՝ հասնելով 2022-ից ի վեր ամենաբարձր մակարդակներին։

Նա նաև զգուշացրել է, որ Օրմուզի նեղուցի հնարավոր երկարատև փակումը կարող է խաթարել ավիացիոն վառելիքի և դիզելի մատակարարումները։ Եթե նավթի և գազի դեպքում կախվածությունը համեմատաբար սահմանափակ է, ապա այդ վառելիքների դեֆիցիտը կարող է լուրջ հետևանքներ ունենալ եվրոպական շուկաների համար։