Խոշոր ավտովթար՝ Արմավիրի մարզում. «Nissan Tiida»-ն Փարաքարի դպրոցի մոտ կոտրել է ցուցանակն ու գլխիվայր հայտնվել դպրոցի ճաղավանդակների մոտ

Երեկ՝ ապրիլի 21-ին, խոշոր ավտովթար է տեղի ունեցել Արարատի մարզում։ Ժամը 23:20-ի սահմաններում Արմավիրի մարզի բնակիչ 40-ամյա Արթուր Ղ.-ն իր վարած «Nissan Tiida» մակնիշի ավտոմեքենայով Երևան-Էջմիածին ավտոճանապարհի Փարաքարի դպրոցի մոտ դուրս է եկել երթևեկելի գոտուց, կոտրել դպրոցի մոտ տեղադրված ցուցանակը և գլխիվայր հայտնվել դպրոցի ճաղավանդակների մոտ։

Ինչպես հայտնում է ֆոտոլրագրող Գագիկ Շամշյանը, վթարի հետևանքով ըստ նախնական տեղեկությունների բարեբախտաբար տուժածներ չկան։

Դեպքի վայր են ժամանել ՀՀ Ներքին գործերի նախարարության ոստիկանության Պարեկային ծառայության Արմավիրի մարզի գումարտակի պարեկները՝ գումարտակի հրամանատար Վանիկ Սաղոյանի գլխավորությամբ։

Վթարի փաստով ՊԾ Արմավիրի մարզի գումարտակում փաստաթղթեր են կազմվում։Վարորդը ենթարկվել է սթափության փորձաքննության, եղել է սթափ։