Գլենդելում հայազգի Կարեն Կազարյանը կարող է դատապարտվել 105 տարի ազատազրկման

Հինգշաբթի օրը Գլենդելում ձերբակալվել է քաղաքի 27-ամյա հայազգի բնակիչ Կարեն Կազարյանը, ով մեղադրվում է հարյուրավոր էլեկտրոնային էջերի գաղտնաբառերը կոտրելու և օգտատերերի նկարները «մերկացնելու» մեջ: Այս մասին նշում է glendalenewspress պարբերականը:

Ինչպես հաղորդում է դատախազության գրասենյակը, Կարենը թվով մոտ 30 խարդախություն իրականացնելու համար օգտագործել է Skype, Facebook և e-mail էլեկտրոնային էջերը: Մոտ 350 կին է զոհ գնացել նրա խարդախություններին: Նրա համակարգչում հայտնաբերել են մոտ 3500 մերկ կամ մասամբ մերկ կանանց նկար: 

Կազարյանը, մուտք գործելով զոհերի էլեկտրոնային էջեր և ունենալով վերջիններիս մերկ նկարները, սոցցանցով կապ է հաստատել վերջիններիս հետ և հարկադրել նրանց մերկանալ տեսախցիկի առջև` վախեցնելով, որ եթե չմերկական, ապա մերկ նկարները կհայտնվեն ցանցում:

Եթե մեղադրանքները հաստատվեն, ապա Կազարյանին սպասում է 105 տարվա ազատազրկում: