Դեսպան Կարապետյանի աշխատանքային այցը Նեապոլ․ քննարկվել են կրթական, մշակութային և նորարարական համագործակցության հեռանկարները

2026թ. մայիսի 11-12-ին դեսպան Կարապետյանն աշխատանքային այցով գտնվում էր Նեապոլում, որի շրջանակներում ունեցավ մի շարք հանդիպումներ քաղաքի ղեկավարության, նաև տեղական ինքնակառավարման, տարածաշրջանային, կրթական, նորարարական և մշակութային ոլորտների ներկայացուցիչների հետ։

 

Դեսպանին այցի ընթացքում ուղեկցում էին Նեապոլի քաղաքապետի խորհրդական Ֆրանչեսկո Սենեսեն և հասարակական ու մշակութային գործիչ Միկկելե Դե Սիմոնեն։

 

Այցի շրջանակներում դեսպան Կարապետյանը հանդիպումներ ունեցավ՝

 Նեապոլի քաղաքապետ պրոֆ. Գաետանո Մանֆրեդիի հետ,

 Նեապոլի քաղաքային խորհրդի նախագահ դոկտ. Վինչենցա Ամատոյի հետ,

 Նեապոլի «L’Orientale» համալսարանի ռեկտոր, պրոֆ. Ռոբերտո Տոտտոլիի հետ,

 Տարածաշրջանային մշտական հանձնաժողովի փոխնախագահ դոկտ. Ֆրանչեսկա Ամիրանտեի հետ,

 Նորարարությունների և «Խելացի քաղաքի» հարցերով Նեապորի քաղաքապետի հանձնակատար Վալերիո Դի Պիետրոյի հետ,

 Կարլո Մորելլիի և նրա մշակութային ասոցիացիայի ներկայացուցիչների հետ։

 

Հանդիպումների ընթացքում քննարկվեցին Հայաստանի և Նեապոլի միջև համագործակցության զարգացման հեռանկարները՝ ընդգրկելով կրթության, գիտության, մշակույթի, տեղական ինքնակառավարման, նորարարությունների, «խելացի քաղաքի» լուծումների, տնտեսական կապերի և քաղաքային զարգացման ոլորտները։

 

Հանդիպումները հնարավորություն տվեցին ամրապնդելու երկկողմ ինստիտուցիոնալ կապերը, նախանշելու կրթական և մշակութային փոխանակումների նոր ուղղություններ, ինչպես նաև քննարկելու Հայաստանի և Նեապոլի միջև գործնական համագործակցության ընդլայնման հնարավորությունները։ Այցն ընդգծեց փոխադարձ հետաքրքրվածությունը՝ զարգացնելու հայ-իտալական կապերը տեղական և տարածաշրջանային մակարդակներում։