Զելենսկին հայտարարել է հրադադարի ավարտի մասին․ գիշերը Ուկրաինայի վրա հարյուրավոր հարվածներ են եղել

Ուկրաինայի նախագահ Վլադիմիր Զելենսկին հայտարարել է, որ Ռուսաստանի և Ուկրաինայի միջև գործող ժամանակավոր հրադադարը ավարտվել է։ Իր Telegram-ալիքում հրապարակված հայտարարության մեջ նա նշել է, որ «Ռուսաստանը ինքն է ընտրել ավարտել մի քանի օր պահպանված մասնակի լռությունը»։

Զելենսկու խոսքով՝ մայիսի 12-ի գիշերը Ուկրաինայի տարածքի ուղղությամբ արձակվել է ավելի քան 200 հարվածային անօդաչու սարք, ինչպես նաև կիրառվել է ավելի քան 80 ավիառումբ։ Ինչպես հայտնում են ուկրաինական աղբյուրները, հարվածների վտանգը տարածվել է Դնեպրոպետրովսկի, Ժիտոմիրի, Նիկոլաևի, Սումիի, Խարկովի և Չեռնիգովի մարզերի, ինչպես նաև Կիևի և մայրաքաղաքային շրջանի վրա։

Հրադադարը գործում էր մայիսի 9-11-ը։ Այդ ժամկետները ավելի վաղ հայտարարել էր ԱՄՆ նախագահ Դոնալդ Թրամփը՝ որպես կողմերի միջև կրակի դադարեցման նախաձեռնություն։ Ռուսաստանի նախագահ Վլադիմիր Պուտինն իր հերթին աջակցել էր այդ առաջարկին՝ նշելով, որ որոշումը կապված է նացիզմի դեմ հաղթանակի հիշատակի նկատմամբ հարգանքի հետ։ Միաժամանակ, Ռուսաստանի պաշտպանության նախարարությունը հայտարարել էր, որ Ուկրաինայի զինված ուժերը բազմիցս խախտել են հրադադարի ռեժիմը՝ իրականացնելով հազարավոր հարվածներ և անօդաչու թռչող սարքերի կիրառումներ։