Պենտագոնի ղեկավարը հայտարարել է ԱՄՆ-ի «սրբազան առաքելության» մասին

ԱՄՆ պաշտպանության նախարար Փիթ Հեգսեթը հայտարարել է, որ Միացյալ Նահանգները շարունակում է իրականացնել իր «սրբազան առաքելությունը»՝ խոսքում ակնարկելով Մերձավոր Արևելքում զարգացող իրադարձություններն ու Իրանի շուրջ աճող լարվածությունը։ Ինչպես հայտնում է The Guardian-ը, Պենտագոնի ղեկավարը ելույթի ժամանակ հատուկ անդրադարձել է ամերիկացի զինվորներին և պատերազմներում զոհվածների հիշատակին։

«Թող Ամենակարող Աստված պաշտպանի մեր զինվորներին, և թող մենք միշտ հարգենք այն խիզախ ամերիկացիների հիշատակը, որոնց կորցրել ենք։ Սա մեր սրբազան առաքելությունն է, և մենք շարունակելու ենք այն կատարել»,- հայտարարել է Հեգսեթը։ Թեև նա բացահայտ չի նշել Իրանի դեմ հնարավոր ռազմական գործողությունները, ամերիկյան և եվրոպական մամուլը նրա խոսքերը կապում է հենց այդ թեմայի հետ։

The Guardian-ը նաև նշում է, որ Հեգսեթը հաճախ է կրոնական ձևակերպումներ օգտագործում ԱՄՆ ռազմական գործողությունների մասին խոսելիս։ Ավելի վաղ նա ելույթի ժամանակ մեջբերել էր մի արտահայտություն, որը ներկայացրել էր որպես աստվածաշնչյան խոսք, սակայն հետո պարզվել էր, որ այն իրականում վերցված էր Քվենտին Տարանտինոյի «Քրեական ընթերցվածք» («Pulp Fiction») ֆիլմից։