Զելենսկու հեռացման սցենարը քիչ հավանական են համարում․ Ուկրաինայում քաղաքական լարվածությունը խորանում է

Ռուս քաղաքական վերլուծաբան Նիկոլայ Տոպորնինը հայտարարել է, որ Ուկրաինայի նախագահ Վլադիմիր Զելենսկու հնարավոր հեռացումը իշխանությունից ներկայում քիչ հավանական է՝ նույնիսկ վերջին քաղաքական և կոռուպցիոն սկանդալների ֆոնին։ «Лента.ру»-ի հետ զրույցում նա նշել է, որ երկրում գործող ռազմական դրությունը թույլ չի տալիս անցկացնել նախագահական ընտրություններ։

Քաղաքագետի խոսքով՝ նույնիսկ եթե Զելենսկին հրաժարական տա, նախագահի լիազորությունները ժամանակավորապես կանցնեն Գերագույն ռադայի ղեկավարին՝ մինչև նոր ընտրությունների անցկացումը։ Տոպորնինը նաև կասկածի տակ է դրել այն սցենարը, թե Ուկրաինայի նախկին գլխավոր հրամանատար Վալերի Զալուժնին կարող է արագ կերպով փոխարինել գործող նախագահին։

Վերջին օրերին Ուկրաինայում մեծ աղմուկ է բարձրացրել նաև նախագահական գրասենյակի նախկին ղեկավար Անդրեյ Երմակի դեմ հարուցված կոռուպցիոն գործը։ Բացի այդ, Զելենսկու նախկին մամուլի քարտուղար Յուլիա Մենդելը հայտարարել էր, որ 2019 թվականին Ուկրաինայի նախագահը խոստացել էր Ռուսաստանին, թե երկիրը չի անդամակցի ՆԱՏՕ-ին, իսկ 2022 թվականի Ստամբուլի բանակցությունների ընթացքում քննարկել է Դոնբասի հարցը։ Տոպորնինի կարծիքով՝ այս ամենը ավելի շատ կապված է Ուկրաինայի ներսում ընթացող քաղաքական պայքարի, քան արտաքին ճնշումների հետ։