Ինչ էր Արարատ Միրզոյանը ասում Փաշինանին․ Ռուբինյանը փակագծեր է բացել

Երեկ համացանցում ուշագրավ տեսանյութ տարածվեց՝ Նիկոլ Փաշինյանի և Արարատ Միրզոյանի մասնակցությամբ, որտեղ քարոզարշավի ժամանակ Միրզոյանն ինչ-որ բան է փսփսում Փաշինյանի ականջին։

Լրատվամիջոցներում հայտնվել է այդ խոսակցությունը, որտեղ Արարատ Միրզոյանը Նիկոլ Փաշինյանի ականջին ասում է․ «Թուրքերը էսօր բացում են, հիշում եք կոդերը, մի հատ welcoming տեքստ անենք համ ԱԳՆ խոսնակի քոմենթով, կամ իմ․․․բայց չգիտեմ՝ դուք ասեք»։

Թե ի՞նչ էր շշնջում Փաշինյանի ականջին, ի՞նչն է բացում Թուրքիան, Միրզոյանը երեկ խուսափեց պարզաբանել, սակայն այսօր ԱԺ փոխնախագահ Ռուբեն Ռուբինյանի գրառումից պարզ է դառնում, որ Թուրքիան որոշել է վերացնել ՀՀ-ի հետ երկկողմ առևտուր իրականացնելու արգելքները, ինչի մասին էլ երեկ գաղտնի խոսում էին Միրզոյանն ու Փաշինյանը․ «Լավ լուր գործարարների համար։ ՀՀ֊Թուրքիա կարգավորման գործընթացի շրջանակում Թուրքիայում գործարկված նոր կարգավորման շնորհիվ այսուհետ հնարավոր կլինի Հայաստանից որևէ երրորդ երկիր, այնտեղից էլ Թուրքիա ուղարկվող կամ նույն երթուղով Թուրքիայից դեպի Հայաստան եկող ապրանքների վերջնական նպատակակետը կամ ելակետը նշել որպես «Հայաստան/Թուրքիա»։

Այսինքն Հայաստանի և Թուրքիայի միջև մաքսային իմաստով ուղիղ՝ առանց վերաձևակերպումների առևտուրը դարձել է հնարավոր։ Շարունակում ենք աշխատել սահմանի՝ այդ թվում Գյումրի֊Կարս երկաթուղու բացման ուղղությամբ»,-գրել է նա։