ԱՄՆ-ում սննդամթերքի գները ռեկորդային աճ են գրանցել

ԱՄՆ-ում սննդամթերքի գներն աճել են վերջին գրեթե չորս տարվա ամենաարագ տեմպերով, հայտնում է The Washington Post-ը։ Ըստ հրապարակման՝ հիմնական պատճառները էներգակիրների թանկացումն են, մաքսատուրքերի ազդեցությունն ու գյուղատնտեսական ոլորտում շարունակվող խնդիրները։

Ամենաշատը թանկացել են ամերիկացիների առօրյա սննդակարգում կարևոր տեղ զբաղեցնող ապրանքները՝ թարմ մրգերը, բանջարեղենն ու տավարի միսը։ Մասնավորապես՝ լոլիկի գինը միայն ապրիլին աճել է 15 տոկոսով, իսկ մեկ տարվա ընթացքում՝ գրեթե 40 տոկոսով։ Տավարի միսն էլ 2026 թվականի ապրիլին 15 տոկոսով ավելի թանկ է եղել, քան մեկ տարի առաջ։

Ընդհանուր առմամբ՝ 2022 թվականի հունվարից ի վեր ԱՄՆ-ում սննդամթերքի գներն աճել են ավելի քան 18 տոկոսով։ Միավորված ազգերի կազմակերպությունն էլ ավելի վաղ հայտարարել էր, որ Իրանի դեմ ԱՄՆ-ի և Իսրայելի գործողությունների ֆոնին համաշխարհային պարենային գները հասել են վերջին երեք տարվա ամենաբարձր մակարդակին։