ԵՄ-ն ողջունել է Թուրքիայի և Հայաստանի միջև երկկողմ առևտրի մեկնարկի մասին հայտարարությունը
Քաղաքական
Եվրամիությունում կարևոր և խորհրդանշական իրադարձություն են համարել Թուրքիայի և Հայաստանի միջև երկկողմ առևտրային հարաբերությունների մեկնարկը։
«ԵՄ-ն ջերմորեն ողջունում է Թուրքիայի այսօրվա հայտարարությունը Հայաստանի հետ երկկողմ առևտրի մեկնարկի վերաբերյալ։ Սա նշանակալի իրադարձություն է հարաբերությունների կարգավորման գործընթացում, ինչի վկայությունն է նաև ապրիլի 28-ին երկու երկրների միջև երկաթուղային հաղորդակցության վերականգնման հարցերով երկկողմ աշխատանքային խմբի վերջին նիստը», — չորեքշաբթի հայտարարել է Եվրամիության արտաքին գործողությունների ծառայության պաշտոնական ներկայացուցիչը։
Նրա խոսքով՝ այս կարևոր քայլը կարող է նպաստել երկու երկրների միջև առևտրատնտեսական հնարավորությունների ընդլայնմանը՝ դրական ազդեցություն ունենալով ամբողջ Հարավային Կովկասի, ինչպես նաև Եվրամիության վրա։
«Մենք կոչ ենք անում երկու երկրներին շարունակել համագործակցությունը, այդ թվում՝ ընդհանուր սահմանի բացման ուղղությամբ», — ասվում է ԵՄ արտաքին քաղաքական ծառայության ներկայացուցչի հայտարարությունում։
Ավելի վաղ՝ նույն օրը, Հայաստանի ԱԳՆ-ում հայտնել էին, որ Թուրքիան վերացրել է Հայաստանի հետ երկկողմ առևտրի իրականացման սահմանափակումները։
«Ողջունում ենք Թուրքիայի որոշումը՝ վերացնելու Հայաստանի հետ երկկողմ առևտրի սահմանափակումները, ինչը Հայաստանի և Թուրքիայի միջև հարաբերությունների կարգավորման գործընթացի ևս մեկ արդյունք է», — նշված էր Հայաստանի ԱԳՆ մամուլի քարտուղարի հայտարարության մեջ, որը տարածել էր նախարարության մամուլի ծառայությունը։
Նշվում էր, որ այս որոշումը կարևոր նշանակություն ունի երկու երկրների միջև առևտրային և գործարար կապերի ընդլայնման, տարածաշրջանում տնտեսական փոխկապակցվածության խթանման, ինչպես նաև խաղաղության և բարեկեցության ապահովման համար։
ՈՒՂԻՂ ԵԹԵՐ
Ամենադիտված 
Հարսը թունավորել է ամուսնուն և նրա ծնողներին հարսանիքից երկու օր անց
