Վկաները դատարանում հայտարարեցին՝ Խաչիկ Գալստյանին չեն ճանաչում

Հակակոռուպցիոն դատարանում, դատավոր Վարդգես Ստեփանյանի նախագահությամբ, շարունակվել է «Հայրենիք» կուսակցության գլխավոր քարտուղար Խաչիկ Գալստյանի գործով դատական նիստը։ Նիստի ընթացքում հարցաքննվել են վկաներ Ռուզաննա Թոսունյանն ու Ազնիվ Ղուկասյանը, սակայն երկուսն էլ հրաժարվել են դատարանում ցուցմունք տալ։

Դատախազի միջնորդությամբ հրապարակվել է Ռուզաննա Թոսունյանի նախաքննական ցուցմունքը, որտեղ ներկայացվել են նաև երկու գաղտնալսված հեռախոսազրույցներ՝ գումարի փոխանցման վերաբերյալ։ Թոսունյանը նշել է, որ խոսքը վերաբերում էր ընտրարշավի ընթացքում իրականացված քարոզչական աշխատանքներին, մասնավորապես՝ բուկլետներ բաժանելուն, որի դիմաց պետք է վարձատրվեր, սակայն գումարը չի ստացել։

Խաչիկ Գալստյանի պաշտպան Արսեն Բաբայանի հարցին ի պատասխան՝ վկան հայտարարել է, որ որևէ մեկին ընտրելու համար չի վարձատրվել և ինքն էլ որևէ անձի գումար չի առաջարկել ընտրության դիմաց։

Ի պատասխան Գալստյանի հարցին՝ արդյոք ճանաչում է իրեն, Թոսունյանն ասել է, որ ճանաչում է միայն թեկնածու Խաչիկ Մանուկյանին, իսկ Խաչիկ Գալստյանին երբևէ չի տեսել և չի ճանաչում։ Երկրորդ վկա Ազնիվ Ղուկասյանը ևս հրաժարվել է ցուցմունք տալ և պատասխանել հարցերին։

Դատարանի նիստից հետո լրագրողների հետ զրույցում պաշտպան Արսեն Բաբայանը նշել է, որ վկաները փաստացի հերքել են մեղադրանքի հիմքերը։

«Առաջին վկան ասաց, որ Խաչիկ Գալստյանն ու Արամ Քոչարյանը որևէ հանցավոր արարք չեն կատարել։ Երկրորդ վկան հրաժարվեց ցուցմունք տալ, սակայն ես միջնորդեցի հրապարակել հարցաքննության տեսաձայնագրությունը։ Այնտեղ, իմ գնահատմամբ, տեսանելի են ճնշման մթնոլորտի դրսևորումներ»,- ասել է Բաբայանը։

Հիշեցնենք՝ քաղաքագիտության դոկտոր, պրոֆեսոր Խաչիկ Գալստյանը մեղադրվում է 2025 թվականի նոյեմբերի 16-ին Վաղարշապատում տեղի ունեցած արտահերթ ընտրությունների ընթացքում ընտրակաշառք բաժանելու մեջ։ Նա կալանավորվել էր 2025 թվականի դեկտեմբերի 30-ին, սակայն փետրվարի 26-ին դատարանը կալանքը փոխարինել էր տնային կալանքով, որը հետագայում երկարաձգվել է ևս երեք ամսով։