Հայաստանի հետ մեր հարաբերությունները մտերիմ են, դաշնակցային, բայց միևնույն ժամանակ՝ բարդ. Լավրով

Ռուսաստանն ու Հայաստանը ներկայումս ունեն մտերիմ, բայց միևնույն ժամանակ բարդ հարաբերություններ՝ հաշվի առնելով Երևանը «ենթարկեցնելու» Արևմուտքի փորձերը։ Այդ մասին հայտարարեց Ռուսաստանի արտաքին գործերի նախարար Սերգեյ Լավրովը Նյու Դելիում BRICS-ի նախարարական հանդիպմանը մասնակցելուց հետո կայացած մամուլի ասուլիսում։

«Մենք հարաբերություններ ունենք Հայաստանի հետ. այդ հարաբերությունները մտերիմ են, դաշնակցային, բայց միևնույն ժամանակ բարդ են՝ հաշվի առնելով, թե ինչպես է Արևմուտքը փորձում ենթարկեցնել Հայաստանը՝ հետևելով Անկախ Պետությունների Համագործակցության որոշ այլ անդամների օրինակին, և խզել Հայաստանի փոխշահավետ տնտեսական, առևտրային և ներդրումային կապերը ԱՊՀ-ի և Եվրասիական տնտեսական միության իր գործընկերների հետ»,- ասել է նա։

Ըստ Լավրովի՝ Եվրասիական տնտեսական միության (ԵԱՏՄ) անդամ երկրները կկարողանան քննարկել Հայաստանը Արևմուտքի ուղեծիր ներգրավելու փորձերի հետ կապված հարցերը միության մայիսին կայանալիք գագաթնաժողովում։

«Հիմա, կարծում եմ, օպտիմալ հնարավորություն է քննարկելու այն ի հայտ եկող խնդիրները, որոնք բխում են Եվրոպական Միության կողմից Հայաստանին իր ուղեծիր ներգրավելու համառությունից, այդ թվում՝ Եվրասիական տնտեսական միության միջոցով Հայաստանի ստացած օգուտները զիջելու գնով։ Այս բոլոր հարցերը անկեղծորեն և բաց քննարկելու հնարավորությունը կստեղծվի մայիսի վերջին շաբաթվա ավարտին, երբ Ղազախստանում կկայանա Եվրասիական տնտեսական բարձրագույն խորհրդի գագաթնաժողովը», -ասաց Լավրովը։

«Այնուամենայնիվ, ես լսեցի, որ վարչապետ Փաշինյանը նշել է, որ զբաղված է ընտրությունների հարցերով և չի կարողանա մասնակցել Եվրասիական տնտեսական միության ղեկավարների այս հանդիպմանը։ Սա, իհարկե, ցավալի կլինի, քանի որ դա լավ հնարավորություն կլինի քննարկելու այն հարցերը, որոնք ներկայումս կախված են օդում», - հավելեց Ռուսաստանի արտաքին գործերի նախարարը։