Թրամփը հայտարարել է Սի Ցզինպինի հետ Թայվանի և Իրանի հարցերում փոխըմբռնման մասին

ԱՄՆ նախագահ Դոնալդ Թրամփը հայտարարել է, որ Չինաստան կատարած այցի ընթացքում կարողացել է փոխըմբռնման հասնել Չինաստանի նախագահ Սի Ցզինպինի հետ Թայվանի և Իրանի թեմաների շուրջ։ Այդ մասին նա ասել է Air Force One ինքնաթիռում լրագրողների հետ զրույցում, որի տեսանյութը հրապարակվել է Սպիտակ տան YouTube-ալիքում։

«Մենք խոսել ենք Թայվանի մասին, շատ ենք խոսել Իրանի մասին։ Կարծում եմ՝ այս երկու հարցերում էլ ունենք շատ լավ փոխըմբռնում»,- նշել է Թրամփը Ալյասկա ուղևորվելու ճանապարհին։

Ավելի վաղ Թրամփն ու Սի Ցզինպինը շուրջ երկու ժամ տևած բանակցություններ էին անցկացրել, որոնց ընթացքում քննարկվել էին Թայվանի, առևտրային հարաբերությունների և ամերիկա-չինական տարաձայնությունների հետ կապված հարցեր։ Այցի ընթացքում Չինաստանի նախագահը նաև խոստացել էր Սպիտակ տան Վարդերի այգու համար Թրամփին վարդերի սերմեր ուղարկել։