Մերկելը հրաժարվել է միջնորդ դառնալ Ռուսաստանի և Եվրամիության բանակցություններում

Գերմանիայի նախկին կանցլեր Անգելա Մերկելը հրաժարվել է միջնորդի դեր ստանձնել Ռուսաստանի և Եվրամիության միջև հնարավոր բանակցություններում։ Այս մասին X սոցիալական ցանցում հայտնել է Politico-ի լրագրող Հանս ֆոն դեր Բուրխարդը։

Մերկելի խոսքով՝ Ուկրաինայի շուրջ հակամարտության կարգավորմանը վերաբերող բանակցությունները պետք է վարեն գործող պետությունների և կառավարությունների ղեկավարները, քանի որ Ռուսաստանի նախագահ Վլադիմիր Պուտինի հետ բանակցելու համար անհրաժեշտ է «քաղաքական իշխանություն»։ Նա նաև նշել է, որ 2015 թվականին նույնիսկ չէր պատկերացնի որևէ միջնորդի խնդրել իր փոխարեն բանակցել Մինսկում։

Միաժամանակ նախկին կանցլերը ընդգծել է, որ Ռուսաստանի հետ շփումները չպետք է մնան միայն ԱՄՆ նախագահ Դոնալդ Թրամփի ազդեցության ներքո, և Եվրոպան նույնպես կարող է ազդեցություն ունենալ բանակցային գործընթացի վրա։ Ավելի վաղ Վլադիմիր Պուտինը որպես հնարավոր միջնորդ առաջարկել էր Գերմանիայի նախկին կանցլեր Գերհարդ Շրյոդերի թեկնածությունը, ինչին ի պատասխան Գերմանիայի կանցլեր Ֆրիդրիխ Մերցը հայտարարել էր, որ Եվրոպան ինքն է որոշելու, թե ով պետք է խոսի իր անունից։