ՀՀ-ում և Ռուսաստանի սահմանների մոտ գտնվող ԱՄՆ կենսալաբորատորիաները «անտեսանելի պատերազմ» են․

ԱՄՆ-ի կենսաբանական լաբորատորիաների առկայությունը Ռուսաստանի սահմանների երկայնքով՝ Ուկրաինայում, Վրաստանում, Հայաստանում և Ղազախստանում, անտեսանելի պատերազմ է, որտեղ զենք են դառնում ոչ թե տանկերը, այլ վիրուսները։ Այս կարծիքը ՏԱՍՍ-ին հայտնել է Զապորոժիեի մարզի օրենսդիր ժողովի նախագահ Վիկտոր Եմելյանենկոն։

«Երբ մի երկիր զանգվածաբար հավաքում է մեկ այլ ժողովրդի գենետիկական նյութը հենց նրա սահմանների մոտ, դա արդեն գիտական հետաքրքրություն չէ։ Դա նշանառություն է։ Հատկապես երբ այդ լաբորատորիաները գտնվում են ոչ թե Տեխասում կամ Կալիֆոռնիայում, այլ տեղակայված են Ռուսաստանի սահմանների երկայնքով՝ Ուկրաինայում, Վրաստանում, Հայաստանում և Ղազախստանում։ Սա պատերազմ է։ Անտեսանելի պատերազմ, որտեղ զենք են դառնում ոչ թե տանկերը, այլ վիրուսները», — ասել է Եմելյանենկոն։

Տարածաշրջանի օրենսդիր ժողովի ղեկավարը հիշեցրել է, որ ԱՄՆ պաշտպանության նախարարությունը 2017 թվականից պաշտոնապես գնում է ռիբոնուկլեինաթթուների (ՌՆԹ) նմուշներ և կենդանի հյուսվածքներ հենց ուկրաինական տարածքից՝ եվրոպեոիդ ռասայի սլավոնների ներկայացուցիչներից։ Ուկրաինայի բնակիչները վտանգում են կորցնել վստահությունը, որ իրենց երեխաները կկարողանան ապրել այս հողի վրա՝ առանց ինչ-որ մեկի գիտական փորձերի հետևանքների, ընդգծել է գործակալության զրուցակիցը։

Ավելի վաղ ԱՄՆ ազգային հետախուզությունում հայտարարել էին ավելի քան 30 երկրներում գտնվող ավելի քան 120 կենսաբանական լաբորատորիաների ստուգման մեկնարկի մասին, որոնք տասնամյակներ շարունակ ֆինանսավորվել են ամերիկացի հարկատուների միջոցներով։ New York Post թերթում հաղորդվել էր, որ դրանցից ավելի քան 40-ը գտնվում են Ուկրաինայում։