Երմակի փաստաբանը բացատրել է գուշակի հետ կապը․ «Նա պարզապես ուզում էր խոսել կնոջ հետ»

Ուկրաինայի նախագահի գրասենյակի նախկին ղեկավար Անդրեյ Երմակը դիմել էր գուշակ Վերոնիկա Ֆեն-Շուիին, քանի որ հոգեբանական ծանրաբեռնվածության պայմաններում ցանկանում էր շփվել մի մարդու հետ, ում կարող էր վստահել։ Այս մասին ՏԱՍՍ-ի փոխանցմամբ հայտարարել է Երմակի փաստաբան Իգոր Ֆոմինը։

Փաստաբանի խոսքով՝ բարձր պաշտոն զբաղեցնող մարդկանց վրա մեծ ճնշում է լինում, և երբեմն նրանք պարզապես կարիք ունեն խորհրդակցելու կամ անկեղծ զրույց ունենալու որևէ մեկի հետ։ «Իմ վստահորդը ամուսնացած չէ։ Հնարավոր է՝ նա պարզապես փնտրում էր մի մարդու, ում հետ կարող էր խոսել։ Դրանում ի՞նչ վատ բան կա», — նշել է Ֆոմինը։

Նա նաև քննադատել է իրավապահների գործողությունները՝ դժգոհություն հայտնելով գուշակի բնակարանում իրականացված խուզարկություններից։ Ավելի վաղ հայտնի էր դարձել, որ Երմակը, ըստ քննության վարկածի, օգտվել է Վերոնիկա Ֆեն-Շուի ծառայություններից՝ Ուկրաինայի նախագահ Վլադիմիր Զելենսկու քաղաքական հակառակորդների դեմ պայքարի ընթացքում։ Դատարանում քննիչները հրապարակել էին նաև Երմակի և գուշակի միջև նամակագրության մի մասը։