Տղամարդը Amazon-ից պատվիրած սափորի մեջ հայտնաբերել է անծանոթ մարդու մոխիր

ԱՄՆ Կալիֆոռնիա նահանգի բնակիչ Մարկ Կալբերսթոնը պատմել է, որ Amazon-ից գնված սափորներից մեկի մեջ իր ընտանիքը պատահաբար հայտնաբերել է անծանոթ մարդու մոխիրը։ Այս մասին հայտնում է KTLA հեռուստաալիքը։

Կալբերսթոնի խոսքով՝ նախորդ տարի մահացել էր իր պապը, և ընտանիքը ինտերնետով մի քանի սափոր էր պատվիրել։ Մի քանի ամիս անց տատիկը պատրաստվել էր ամուսնու մոխիրը տեղափոխել սափորի մեջ, սակայն այն բացելուց հետո ներսում հայտնաբերել էր արդեն առկա մարդկային մոխիր։

Տղամարդը կապ է հաստատել Amazon-ի հետ, սակայն, նրա խոսքով, ընկերությունը չափազանց սովորական արձագանք է տվել դեպքին՝ պարզապես առաջարկելով վերադարձնել գումարը։ Կալբերսթոնը հրաժարվել է փոխհատուցումից և հայտարարել, որ ցանկանում է գտնել այն մարդու հարազատներին, ում մոխիրը հայտնվել է իրենց մոտ։ Նրա խոսքով՝ պատրաստ է ժամանակ և ջանք ներդնել, որպեսզի անհայտ անձի հիշատակը պատշաճ կերպով հարգվի։ Amazon-ը առաջարկել է սափորը հանձնել տեղական թաղման բյուրոյին, սակայն ընտանիքը շարունակում է ինքնուրույն որոնումները։