Ռուսաստանում անշարժ գույքի 30 «արքաներից» 3-ը հայ են. Forbes

Forbes պարբերականը ներկայացրել է Ռուսաստանի անշարժ գույքի «արքաների» ցուցակը, որում ներկայացված 30 ներկայացուցիչներից 3-ը հայ են։

Ցուցակը գլխավորում է «Киевская площадь» հոլդինգը, որի վարձակալությունից ստացված տարեկան եկամուտը կազմում է 1,1 մլրդ դոլար: 

Ցուցակի երրորդ տեղում է «Տաշիր» հոլդինգի սեփականատեր Սամվել Կարապետյանը։ Անշարժ գույքի վարձակալությունից ստացվող նրա տարեկան եկամուտը կազմում է 720 մլն դոլար։ Սամվել կարապետյանի հիմնական օբյեկտներն են «Ռիո» առևտրի կենտրոնը և «Երևան Պլազան»: Նրա անշարժ գույքը հիմնականում գտնվում է Մոսկվայում, Սանկտ Պետերբուրգում, Ռեուտովում, Յարոսլավլում, Բելգորոդում, Իվանովոյում, Կալուգայում, Սոչիում, Յալթայում, Վոլոգդայում, Տուլայում, Տվերում, Սմոլենսկում, Երևանում և Կալումնայում։

Սամվել Կարապետյանը սկզբում աշխատել է Հայաստանում 1990-ական թվականներին, այնուհետև տեղափոխվել է Կալուգա, որտեղ զբաղվել է մեծածախ առևտրով և տեքստիլի արտադրությամբ։

Այժմ «Տաշիրը» բազմաֆունկցիոնալ կազմակերպություն է, որի մասնաճյուղերը զբաղվում են շինարարությամբ, մեծածախ և մանրածախ առևտրով և այլ բնագավառներով: 

Ցուցակի 25-րդ տեղն է զբաղեցրել Դանիլ Խաչատուրովը, ով «Լեգիոն դեվելոփմենթ» ընկերության սեփականատերն է։ Վարձավճարներից նրա տարեկան եկամուտը կազմում է 80 մլն դոլար։ Գործունեությունը հիմնականում ծավալում է Մոսկվայում։

Խոշոր օբյեկտներն են՝ «Լեգիոն I» և «Լեգիոն III»-ը միջազգային ֆինանսական կազմակերպությունները (ընդհանուր՝ 130.000 քմ տարածքով)։

Սկզբում զբաղվել է արժեթղթերի առքուվաճառքով, աշխատել է «Սլավնավթ»-ում, մասնակցել է «Ռոսգոսստրախ»-ի մասնավորեցմանը, որի գլխավոր տնօրենն է դարձել 2004-ին։ «Ռոսգոստրախ» բանկի համասեփականատեր է։

26-րդ տեղը զբաղեցրել է Գագիկ Ադիբեկյանը։ Վարձավճարներից նրա տարեկան եկամուտը 70 մլն դոլար է։ Գործում է Մոսկվայում։

Խոշոր օբյեկտներն են «Ռոմանով դվոր» (43.500 քմ) և «Վրեմենա գոդա» (64.000 քմ) բիզնես կենտրոնները։

RD group-ի սեփականատեր Գագիկ Ադիբեկյանը մոսկովյան շուկայի ամենահանելուկային ֆիգուրներից մեկն է։ 1997-ին նա վերանորոգել է Մոսկվայի կենտրոնում գտնվող «Ռոմանով դվոր» բիզնես կենտրոնը։ Թե ինչով է զբաղվել մինչ այդ, անհայտ է։

RD Group-ը 2012-ին ձեռք է բերել «Վրեմենա գոդա» առևտրի կենտրոնի 40%-ը, և այժմ, մամուլի տվյալներով, բանակցություններ է վարում մնացած 60%-ի գնման համար։