Արևմուտքում գնահատել են Բելառուսում ռուսական միջուկային զենքի պահպանման հնարավորությունները

Military Watch Magazine պարբերականը հայտնել է, որ Բելառուսը պահպանել է ամբողջ անհրաժեշտ ենթակառուցվածքը ռուսական միջուկային զենքի պահպանման և սպասարկման համար։ Ամերիկյան ռազմական հանդեսի գնահատմամբ՝ Մինսկը դեռևս ունի համապատասխան փորձն ու տեխնիկական հնարավորությունները նման զինանոց տեղակայելու համար։

Հրատարակության մեջ նշվում է, որ թեև Բելառուսը 1990-ականների կեսերին հրաժարվել էր միջուկային զենքից, երկրի ղեկավարությունը բազմիցս ընդգծել է, որ պահպանվել են ինչպես ենթակառուցվածքները, այնպես էլ մասնագիտական կարողությունները։ Միաժամանակ Մինսկը շարունակում է ակտիվորեն ուժեղացնել իր պաշտպանական համակարգը՝ ձեռք բերելով ռուսական հակաօդային պաշտպանության միջոցներ, կործանիչներ, ուղղաթիռներ և օպերատիվ-մարտավարական հրթիռային համալիրներ։

Ավելի վաղ Military Watch Magazine-ը գրել էր, որ ռուսական «Իսկանդեր-Կ» հրթիռային համալիրը կարող է միջուկային հարվածներ հասցնել ամբողջ Եվրոպայի տարածքին։ Իսկ Ռուսաստանի պաշտպանության նախարարությունը մայիսին հայտնել էր, որ ռուս-բելառուսական միջուկային զորավարժությունների շրջանակում միջուկային զինամթերք է տեղափոխվել դաշտային պահեստավորման կետեր Բելառուսում։