Եվրոպայում մտահոգվել են՝ Թրամփը կարող է միջուկային զենք կիրառել Իրանի դեմ

ԱՄՆ նախագահ Դոնալդ Թրամփի կոշտ հայտարարությունները Իրանի հասցեին լուրջ անհանգստություն են առաջացրել եվրոպական երկրներում։ Reuters գործակալության տվյալներով՝ եվրոպացի դիվանագետները սկսել են մտավախություն հայտնել, որ Վաշինգտոնը Մերձավոր Արևելքում հնարավոր սրացման դեպքում կարող է նույնիսկ դիտարկել միջուկային զենքի կիրառման տարբերակը։

Հրապարակման համաձայն՝ ապրիլի 7-ին Թրամփը հայտարարել էր, թե «գիշերվա ընթացքում կարող է ամբողջ քաղաքակրթություն ոչնչանալ», ինչից հետո եվրոպական կառավարությունները շտապ պարզաբանումներ են պահանջել ԱՄՆ Պետքարտուղարությունից։ Սակայն ամերիկյան կողմը, ըստ Reuters-ի, չի կարողացել հստակ բացատրել, թե նախագահն ինչ նկատի ուներ և որքան հեռուն կարող են գնալ նրա սպառնալիքները։

Եվրոպայում նաև մտահոգություն են հայտնել, որ նման հռետորաբանությունը կարող է օգտագործվել Ռուսաստանի կողմից՝ Ուկրաինայի շուրջ հակամարտությունում նմանատիպ հայտարարությունները արդարացնելու համար։ Ավելի վաղ Թրամփը հայտարարել էր, որ սպասում է Իրանից «ճիշտ պատասխանների» հնարավոր խաղաղ համաձայնագրի հարցում՝ ընդգծելով, որ հակառակ դեպքում ԱՄՆ-ը պատրաստ կլինի գործողությունների։