Al Arabiya․ ԱՄՆ-ն ու Իրանը կարող են ժամերի ընթացքում հայտարարել կարևոր համաձայնագրի մասին

ԱՄՆ-ի և Իրանի միջև հնարավոր համաձայնագրի վերջնական նախագիծը կարող է հրապարակվել առաջիկա ժամերին։ Այդ մասին հայտնում է Al Arabiya հեռուստաալիքը՝ նշելով, որ համաձայնությունը ձեռք է բերվել Պակիստանի միջնորդությամբ և վերաբերում է կողմերի միջև լարվածության կարգավորմանը։

Հեռուստաալիքի տվյալներով՝ նախագծում ներառված են մի շարք առանցքային պայմաններ՝ ամբողջական և անհապաղ հրադադար ցամաքում, օդում և ծովում, ռազմական ու քաղաքացիական ենթակառուցվածքների նկատմամբ հարվածների դադարեցում, ինչպես նաև տեղեկատվական պատերազմի ավարտ։ Փաստաթուղթը նաև նախատեսում է երկրների ինքնիշխանության և տարածքային ամբողջականության հարգում, ինչպես նաև Պարսից և Օմանի ծոցերում ու Հորմուզի նեղուցում ազատ նավարկության երաշխավորում։

Բացի այդ, համաձայնագրով նախատեսվում է ստեղծել համատեղ վերահսկողական մեխանիզմ՝ պայմանավորվածությունների կատարման մշտադիտարկման և վեճերի լուծման համար։ Al Arabiya-ի փոխանցմամբ՝ ԱՄՆ-ը փուլային տարբերակով կարող է թուլացնել Իրանի նկատմամբ սահմանված պատժամիջոցները՝ պայմանով, որ Թեհրանը հավատարիմ մնա համաձայնագրի դրույթներին։ Նշվում է նաև, որ փաստաթուղթը համապատասխանում է միջազգային իրավունքին և ՄԱԿ-ի կանոնադրությանը։