ԱՄՆ-ը Ճապոնիայում կտեղակայի Typhon հրթիռային համակարգեր

ԱՄՆ-ը ժամանակավորապես կտեղակայի Typhon հրթիռային համալիրներ Ճապոնիայի տարածքում՝ համատեղ զորավարժությունների շրջանակում։ Այդ մասին հայտնել է Ռուսաստանում Ճապոնիայի դեսպանատունը՝ նշելով, որ համակարգերը կօգտագործվեն ամերիկա-ճապոնական Valiant Shield և Orient Shield զորավարժությունների ընթացքում։

Հաղորդվում է, որ Typhon համակարգերը կտեղակայվեն Ճապոնիայի ծովային ինքնապաշտպանական ուժերի Կանոյա ավիաբազայում։ Ճապոնական կողմը վստահեցրել է, որ տեղակայումը կրում է բացառապես ժամանակավոր և ուսումնական բնույթ, իսկ հրթիռային համալիրները նախատեսվում է դուրս բերել մինչև հոկտեմբերի կեսերը։ Դրանից հետո դրանք կպահվեն ամերիկյան ռազմաբազայում։

Սակայն նման քայլերն արդեն առաջացրել են Ռուսաստանի դժգոհությունը։ Ավելի վաղ ՌԴ ԱԳՆ պաշտոնական ներկայացուցիչ Մարիա Զախարովան հայտարարել էր, որ ԱՄՆ-ի կողմից Typhon համակարգերի տեղակայումը Ռուսաստանի սահմաններին մոտ շրջաններում սպառնալիք է երկրի անվտանգությանը և նպաստում է տարածաշրջանային լարվածության աճին։ Նախորդ տարի նման համալիրների երկարատև տեղակայումը դժգոհություն էր առաջացրել նաև Ճապոնիայում գործող հասարակական կազմակերպությունների շրջանում։