Սիխարուլիձեն մեկնաբանել է Ալեքսանդր Պլյուշչենկոյի՝ Ադրբեջան տեղափոխվելու որոշումը

Ռուսաստանի գեղասահքի ֆեդերացիայի նախագահ Անտոն Սիխարուլիձեն մեկնաբանել է Եվգենի Պլյուշչենկոյի որդու՝ Ալեքսանդր Պլյուշչենկոյի՝ Ադրբեջանի հավաքականում հանդես գալու որոշումը։ Նրա խոսքով՝ մարզիկի անցումը լիովին համապատասխանում է գործող կանոններին։

Սիխարուլիձեն նշել է, որ երիտասարդ գեղասահորդը նախկինում չի ընդգրկվել Ռուսաստանի ազգային հավաքականներում և չի մասնակցել միջազգային մրցաշարերի։ Այդ պատճառով, ըստ նրա, մարզական քաղաքացիության փոփոխության հարցում որևէ խախտում չի արձանագրվել։

Ֆեդերացիայի ղեկավարը նաև ընդգծել է, որ անչափահաս մարզիկների դեպքում նման որոշումները կայացնում են ծնողները։ Նա հավելել է, որ ռուսական կողմը օրինական կերպով թույլ է տվել Ալեքսանդր Պլյուշչենկոյին հանդես գալ Ադրբեջանի համար և հաջողություն է մաղթել նրան նոր փուլում։ Ավելի վաղ Պետդումայում քննադատել էին Եվգենի Պլյուշչենկոյին՝ այդ որոշումը սխալ համարելով։