Հայաստանը ԵԱՏՄ-ից դուրս գալու դեպքում կարող է վտանգել առևտրաշրջանառության 40%-ը

Եվրասիական տնտեսական միությունից դուրս գալու դեպքում Հայաստանը կարող է վտանգել իր արտաքին առևտրաշրջանառության գրեթե 40 տոկոսը․ այս եզրակացությանն է եկել ՌԻԱ Նովոստին՝ ուսումնասիրելով ազգային վիճակագրական ծառայությունների տվյալները։

ԵԱՏՄ անդամակցությունից հրաժարվելու դեպքում Երևանը կարող է կորցնել այն առևտրային արտոնությունները, որոնք ստանում էր միության շրջանակում․ մասնավորապես՝ անդամ երկրների համար գործող միասնական ցածր՝ 5 տոկոս մաքսատուրքային դրույքաչափը, ինչպես նաև որոշ դեպքերում ապրանքների անտուրք ներմուծման իրավունքը։

2025 թվականին Հայաստանը ԵԱՏՄ երկրներ ապրանքների արտահանումից ստացել է 3,2 միլիարդ դոլար։ Առևտրային եկամտի հիմնական մասը ձևավորվել է ռուսական շուկա մատակարարումների հաշվին՝ 2,9 միլիարդ դոլար։

Միևնույն ժամանակ, հայ ներմուծողները ԵԱՏՄ երկրներից գնել են 5 միլիարդ դոլարի ապրանք։ Հիմնականում ներմուծվել է ռուսական արտադրանք՝ 4,87 միլիարդ դոլարի չափով։

Այսպիսով, 2025 թվականին Երևանի և ԵԱՏՄ-ի միջև ապրանքաշրջանառությունը կազմել է 8,2 միլիարդ դոլար, մինչդեռ աշխարհի մնացած երկրների հետ՝ 13,2 միլիարդ դոլար։ Սա նշանակում է, որ միության երկրների հետ առևտուրը կազմում է Հայաստանի ընդհանուր ապրանքաշրջանառության 38,5 տոկոսը։