Կրակոցներ՝ Էջմիածին քաղաքում. քրեական ոստիկանները տաք հետքերով հայտնաբերել են միջադեպի մասնակիցներին և հանցագործության գործիք ինքնաձիգը

Այսօր՝ մայիսի 28-ին, SHAMSHYAN.com-ը տեղեկություն էր հրապարակել մայիսի 27-ին Էջմիածին քաղաքում տեղի ունեցած միջադեպից, որի մասին ՀՀ Ներքին գործերի նախարարության ոստիկանության քրեական ոստիկանության գլխավոր վարչության Արմավիրի մարզային վարչությունում ստացել էին օպերատիվ տեղեկություններ, անգամ, որ այդ միջադեպին մասնակիցներից մեկը իր մոտ եղած ինքնաձիգից 30-ից ավելի կրակոցներ է արձակել։

Ինչպես դեպքի վայրից հայտնում է ֆոտոլրագրող Գագիկ Շամշյանը, Վաղարշապատ էին ժամանել քրեական ոստիկանները՝ վարչության պետ Երվանդ Նիկոյանի վարչության պետի տեղակալ Հովհաննես Արիստակեսյանի գլխավորությամբ, ովքեր պարզել են, որ ստացված օպերատիվ տեղեկությունները հավաստի են և մնում էր միայն պարզել կրակոցների փաստը, ու դա Արմավիրի մարզի քրեական ոստիկաններին հաջողվում է։

Կարճ ժամանակում հաստատվում է կրակոցների փաստը ու քրեական ոստիկանները Էջմիածին քաղաքի Խաչատուր Աբովյանի անվան թիվ 4 հիմնական դպրոցի 1-ին և 3-րդ հարկերի պատուհանների, փողոցի վրա գործող դեղատան պատուհանի, դեղատան կողքին գտնվող բնակչի տան պատուհանի և դպրոցի հարևանությամբ գտնվող շինության պատերին հայտնաբերում են կրակոցի բազմաթիվ հետքեր։

Օպերատիվ տեղեկություններով պարզվում է նաև, որ կրակոցի հետևանքով տուժածներ չկան։

Դեպքի մասին ոստիկանության Վաղարշապատի բաժնից տեղեկությունը փոխանցվում է ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին, որտեղից ժամանում է քննչական խումբը՝ օրվա պատասխանատու հերթապահ քննիչի և քննչական կոմիտեի փորձաքրեագետի գլխավորությամբ։

Դեպքի փաստով Վաղարշապատի քննչական բաժնում նախաձեռնվել է քրեական վարույթ։Ֆոտոլրագրողի տեղեկություններով՝ Արմավիրի քրեական ոստիկանները լուսաբացին հայտնաբերել են նաև 6-րդ մասնակցին, ինչպես նաև հանցագործության գործիք ինքնաձիգը։Նախաքննության շահերից ելնելով որոշ մանրամասներ այս պահին չենք հրապարակում։