Թրամփը մոտ օրերս որոշում կկայացնի Իրանի հետ գործարքի շուրջ․ պահանջում է բացել Հորմուզի նեղուցը

ԱՄՆ նախագահ Դոնալդ Թրամփը հայտարարել է, որ առաջիկայում վերջնական որոշում կկայացնի Իրանի հետ հրադադարի երկարաձգման վերաբերյալ առաջարկվող համաձայնագրի շուրջ։ Խոսքը վերաբերում է ապրիլին հաստատված 60-օրյա հրադադարի հնարավոր երկարաձգմանը, որը կողմերին ժամանակ կտա մշտական համաձայնության հասնելու համար։

Թրամփը նշել է, որ Իրանը պետք է հրաժարվի միջուկային զենք ստեղծելու հնարավորությունից և անհապաղ բացի Հորմուզի նեղուցը՝ առանց որևէ վճարի կամ սահմանափակման։ Սակայն Թեհրանը դեռ չի համաձայնել այդ պահանջներին։ Իրանական կողմը պնդում է, որ նեղուցի կառավարման հարցը պետք է որոշեն Իրանը և Օմանը։

Միևնույն ժամանակ Reuters-ի աղբյուրների փոխանցմամբ՝ Վաշինգտոնի և Թեհրանի միջև քաղաքական համաձայնության հասնելու հնարավորությունը մեծացել է։ Քննարկվում է նաև Իրանի սառեցված ակտիվների մի մասի ապասառեցումը։ Գործարքի հնարավոր կնքման մասին լուրերի ֆոնին համաշխարհային նավթի գները նվազել են, իսկ ֆոնդային շուկաներում նկատվել է աճ։ Թրամփի վրա միաժամանակ աճում է ճնշումը՝ ԱՄՆ-ում վառելիքի գները նվազեցնելու և Հորմուզի նեղուցով նավագնացությունը լիովին վերականգնելու համար։