Mercedes-Benz-ը կարող է հայտնվել ԱՄՆ շուկայից դուրս մղվելու վտանգի առաջ

Գերմանական ավտոարտադրող Mercedes-Benz ընկերությունը կարող է բախվել ԱՄՆ շուկայում գործունեության սահմանափակումների կամ նույնիսկ արգելքի՝ Չինաստանի հետ ունեցած կապերի պատճառով։ CNBC-ի փոխանցմամբ՝ ԱՄՆ Կոնգրեսում քննարկվում է երկկուսակցական օրինագիծ, որը նախատեսում է սահմանափակել այն ավտոարտադրողների գործունեությունը, որոնց կապիտալում առկա են Չինաստանի կամ այլ «մրցակից պետությունների» պետական մասնակցություններ։

Օրինագծի համաձայն՝ արգելքի տակ կարող են հայտնվել այն ընկերությունները, որոնց բաժնետերերի թվում կան օտարերկրյա պետական կառույցներ։ Այս չափանիշին համապատասխանում է Mercedes-Benz-ը, որի խոշոր բաժնետերերից է չինական պետական ավտոարտադրող BAIC Group-ը։

Աղբյուրների տվյալներով՝ օրինագծում նախատեսված բացառությունները, հավանաբար, չեն տարածվի Mercedes-Benz-ի վրա՝ չնայած այն հանգամանքին, որ ընկերությունն ունի զգալի արտադրական հզորություններ ԱՄՆ-ում։ Եթե նախաձեռնությունը հաստատվի, դա կարող է լուրջ հարված հասցնել գերմանական բրենդի դիրքերին ամերիկյան շուկայում և դառնալ ԱՄՆ-Չինաստան տնտեսական դիմակայության հերթական դրսևորումը։